இரண்டாம் இணைப்பு
தெஹிவளை துப்பாக்கிச்சூடு: ‘கோஸ் மல்லி’ கும்பலின் பழிவாங்கல் – 46 வயது நபர் படுகாயம்
தெஹிவளை, இலங்கை – தெஹிவளை ரயில் நிலையம் அருகே இன்று காலை இடம்பெற்ற துப்பாக்கிச்சூடு சம்பவம், பாதாள உலகக் குழுக்களுக்கிடையேயான நீண்டகால மோதலின் விளைவாக இருக்கலாம் என ஆரம்பகட்ட பொலிஸ் விசாரணைகள் தெரிவிக்கின்றன. இந்தத் தாக்குதலுக்கு ‘கோஸ் மல்லி’ என அறியப்படும் ஒழுங்கமைக்கப்பட்ட குற்றவாளி மற்றும் போதைப்பொருள் கடத்தல்காரன் ஷாந்த குமார தலைமையிலான குழுவே காரணம் என சந்தேகிக்கப்படுகிறது.
துப்பாக்கிச்சூட்டில் காயமடைந்த சுதத் குமார, ‘பஸ் அசித’ என அடையாளம் காணப்பட்டுள்ளார். இவர் அப்பகுதியில் உள்ள மற்றொரு முக்கிய ஒழுங்கமைக்கப்பட்ட குற்றவாளியும், போதைப்பொருள் கடத்தல்காரனுமான ‘படவிட்ட அசங்க’வின் நெருங்கிய உறவினர் ஆவார். இந்த இரு குழுக்களுக்கும் இடையே நீண்டகாலமாக நிலவிவரும் மோதலின் தொடர்ச்சியே இன்றைய துப்பாக்கிச்சூடு என நம்பப்படுகிறது.
46 வயதான சுதத் குமார, தற்போது களுபோவில போதனா வைத்தியசாலையில் சிகிச்சை பெற்று வருகிறார். இவர் வெல்லவத்தையில் வசித்து வந்தாலும், இவரது பூர்வீகம் ஹொரணை, கொரளைம ஆகும். ‘படவிட்ட அசங்க’வின் போதைப்பொருள் வலையமைப்பில் இவர் விநியோகஸ்தராக செயல்பட்டுள்ளார் என விசாரணைகளில் தெரியவந்துள்ளது. ‘பஸ் அசித’ ஒரு பஸ் உரிமையாளரும், வட்டிக்கு பணம் கொடுப்பவரும் என பொலிஸார் தெரிவித்துள்ளனர்.
இச்சம்பவம், ‘பஸ் அசித’ தெஹிவளை ரயில் நிலையம் அருகே ஒரு மோட்டார் காருக்குள் இருந்தபோது நடந்துள்ளது. கருப்பு நிற மோட்டார் சைக்கிளில் வந்த இரண்டு நபர்களில் பின்னால் அமர்ந்திருந்தவர் கீழே இறங்கி, காருக்கு அருகில் சென்று கைத்துப்பாக்கியால் சுட்டுவிட்டுத் தப்பிச் சென்றுள்ளார். இச்சம்பவம் அருகில் உள்ள சிசிடிவி கமராக்களில் பதிவாகியுள்ளது. தாக்குதல் நடத்தியவர்கள் வெல்லவத்தையை நோக்கி தப்பிச் செல்வதும் பதிவாகியுள்ளது.
இந்த ஆண்டு இதுவரை 71 துப்பாக்கிச்சூடு சம்பவங்கள் பதிவாகியுள்ளதாகவும், அவற்றில் 38 பேர் உயிரிழந்துள்ளதுடன், 40 பேர் காயமடைந்துள்ளதாகவும் பொலிஸார் மேலும் தெரிவித்தனர்.
பகீர் சம்பவம்! தெஹிவளை ரயில் நிலையம் அருகே துப்பாக்கிச் சூடு – நடுங்க வைக்கும் சிசிடிவி காட்சிகள் வெளியீடு! – 45 வயது நபர் படுகாயம் – மர்ம நபர்கள் தப்பியோட்டம்!
தெஹிவளை: கொழும்பின் முக்கியப் பகுதியான தெஹிவளை ரயில் நிலையம் அருகே இன்று (வெள்ளிக்கிழமை) பகல்வேளையில், ஒருவர் மீது சரமாரியாகத் துப்பாக்கிச் சூடு நடத்தப்பட்ட சம்பவம் பெரும் பரபரப்பை ஏற்படுத்தியுள்ளது. மக்கள் நடமாட்டம் மிகுந்த பகுதியில் நடந்த இந்தத் துணிச்சலான தாக்குதல், பொதுமக்களிடையே பெரும் அச்சத்தை விதைத்துள்ளது.
சற்று முன்னர் இடம்பெற்ற இந்தத் துப்பாக்கிச் சூட்டில் காயமடைந்த 45 வயது மதிக்கத்தக்க நபர், உடனடியாகக் களுபோவில வைத்தியசாலையில் அனுமதிக்கப்பட்டுள்ளதாகத் தகவல்கள் தெரிவிக்கின்றன. அவரது உடல்நிலை குறித்த மேலதிக தகவல்கள் வெளியாகவில்லை.
சம்பவம் நடந்தபோது, மோட்டார் சைக்கிளில் வந்த அடையாளம் தெரியாத இருவரே இந்தத் துப்பாக்கிச் சூட்டை நடத்தியுள்ளனர். தாக்குதலை முடித்தவுடன், அந்த நபர்கள் மின்னல் வேகத்தில் சம்பவ இடத்திலிருந்து தப்பிச் சென்றுள்ளதாக நேரில் கண்டவர்கள் தெரிவித்துள்ளனர்.
துப்பாக்கிச் சூட்டுக்கான உடனடி காரணம் குறித்து இதுவரை எந்தத் தகவலும் வெளியாகவில்லை. இது தனிப்பட்ட பகையா அல்லது வேறு ஏதேனும் பின்னணி உள்ளதா என பொலிஸார் தீவிர விசாரணைகளை ஆரம்பித்துள்ளனர்.
குறிப்பாக, சம்பவத்தின் போது அப்பகுதியில் பொருத்தப்பட்டிருந்த சி.சி.டி.வி கெமராக்களில் பதிவான காட்சிகள் தற்போது வெளியாகியுள்ளன. இந்த அதிர்ச்சி தரும் காட்சிகள், துப்பாக்கிச் சூடு நடந்த விதத்தையும், மர்ம நபர்களின் நடமாட்டத்தையும் பகுதியளவு வெளிப்படுத்துவதால், பொலிஸாருக்கு விசாரணையில் ஒரு முக்கியத் தடயமாக அமையலாம் என எதிர்பார்க்கப்படுகிறது. இக்காட்சிகளைக் கொண்டு சந்தேக நபர்களை அடையாளம் காணும் பணிகள் துரிதப்படுத்தப்பட்டுள்ளன.
இந்தச் சம்பவம் தெஹிவளைப் பகுதியில் பதட்டமான சூழலை உருவாக்கியுள்ளதுடன், பொலிஸ் பாதுகாப்பும் பலப்படுத்தப்பட்டுள்ளது.
