மதுரை: சினிமாவை மிஞ்சிய சேசிங் – சிக்கியது 1000 கிலோ கஞ்சா

இந்த செய்தியை பகிருங்கள்

மதுரையில் வணிகவரித்துறை அதிகாரிகள் வாகன சோதனை செய்தபோது ஆயிரம் கிலோ கஞ்சா பறிமுதல் செய்யப்பட்டுள்ளது.

மதுரை மாவட்டத்தில் மதுரை மண்டல வணிகவரித்துறை நுண்ணறிவு பிரிவு சார்பாக மதுரை – திருச்சி தேசிய நெடுஞ்சாலையில் வண்டியூர் அருகே வாகன சோதனை நடந்தது. அப்போது அந்த வழியாக மினி வேன் ஒன்று வந்துள்ளது.

வணிக வரித்துறை அதிகாரிகள் அந்த மினி வேனை சோதனை செய்ய சென்றனர். அப்போது திடீரென அந்த வேன் வேகமாக அங்கிருந்து கிளம்பியது.

அதில் சந்தேகமடைந்த அதிகாரிகள் விரைந்து அந்த அவனை மற்றொரு வாகனம் மூலம் விரட்டி சென்றனர். சுமார் 5 கிலோமீட்டர் தூரம் விரட்டி சென்ற நிலையில் அந்த மினிவேன் பிடிபட்டது.

அதனைத் தொடர்ந்து அதில் அதிகாரிகள் சோதனை செய்தபோது அதில் சுமார் 1,000 கிலோ கஞ்சா மூட்டைகள் இருப்பது தெரியவந்தது. பின்னர் வணிக வரித்துறை அதிகாரிகள் அந்த மினி வேனை பறிமுதல் செய்தனர்.

மேலும் வணிகவரித்துறை நுண்ணறிவு பிரிவினர் பிடிபட்ட 1,000 கிலோ கஞ்சா மூட்டைகள் மற்றும் பறிமுதல் செய்யப்பட்ட மினி வேனை காவல்துறையினரிடம் ஒப்படைத்தனர். காவல்துறையினரின் முதற்கட்ட விசாரணையில் அந்த 1000 கிலோ கஞ்சா விசாகப்பட்டினத்தில் இருந்து கடத்தி கொண்டு வரப்பட்டது தெரியவந்தது.

அதனைத் தொடர்ந்து கஞ்சாவை பறிமுதல் செய்த போலீசார் வாகனத்தை ஓட்டிவந்த பிரகாஷ் என்பவரை கைது செய்து அவரிடம் விசாரணை மேற்கொண்டு வருகின்றனர். வணிகவரித்துறை வாகன சோதனையில் ஆயிரம் கிலோ கஞ்சா பறிமுதல் செய்யப்பட்ட சம்பவம் மதுரையில் பெரும் பரபரப்பையும் அதிர்ச்சியையும் ஏற்படுத்தியுள்ளது.


இந்த செய்தியை பகிருங்கள்

Contact Us