நடிகை நயன்தாரா, நடிகர் தனுஷ் மோதல் விவகாரம் பரபரப்பை கிளப்பியுள்ளது. தனது ஆவணப்படம் தொடர்பான விவகாரத்தில் தனுஷின் செயல்களை நயன்தாரா கடுமையாக விமர்சித்துள்ளார். அவரின் பதிவுக்கு தனுஷ் உடன் ஜோடியாக நடித்த பல நடிகைகள் ஆதரவு தெரிவித்துள்ளனர்.
தனது திருமண ஆவணப்படம் தொடர்பாக நடிகை நயன்தாரா நடிகர் தனுஷ் குறித்து பரபரப்பு குற்றச்சாட்டுகளை வைத்துள்ளார். இதுகுறித்து நயன்தாரா தனுஷை குறிப்பிட்டு வெளியிட்டுள்ள விளக்கத்தில், நீங்கள் உங்கள் அப்பா, அண்ணன் உதவியுடன் சினிமாத்துறையில் பிரபலமாகியுள்ளீர்கள்.
நான் எந்த பின்புலம் இல்லாமல் கடின உழைப்பாலும், நேர்மையாலும் இந்த நிலையை அடைந்திருக்கிறேன். நானும் ரௌடிதான்’ படத்தின் பாடல்களை ரசிகர்கள் இப்போதும் கொண்டாடுகிறார்கள். அதை என் திருமணம் ஆவணப்படத்தில் பயன்படுத்தக் கூடாது என்பது மிகுந்த வருத்தத்தை ஏற்படுத்தும். இது உங்களைத் தவிர மற்ற எல்லாருக்கும் புரியும். வியாபார ரீதியாகவோ அல்லது காப்புரிமையை காட்டி சட்டரீதியாகவோ மறுத்திருந்தால் பரவாயில்லை. ஆனால் என் மீது உங்களுக்குள்ள தனிப்பட்ட வெறுப்பால் வெளிப்படும் இந்த நடவடிக்கைகளை எப்படி ஏற்க முடியும்.
சமீபத்தில் வெளியான எங்கள் திருமண ஆவணப்படம் தொடர்பான டிரெய்லரில் இடம்பெற்ற 3 விநாடி காட்சிக்கு ரூ.10 கோடி நஷ்ட ஈடு கேட்டு நோட்டீஸ் அனுப்பியிருப்பது ஆச்சர்யமாக உள்ளது. அதை நாங்கள் சட்டப்பூர்வமாக எதிர்கொள்வோம். மிகவும் கீழ் தரமான இந்த செயலின் மூலம், நீங்கள் எப்படிப்பட்ட மனிதர் என்பது வெளிச்சத்துக்கு வந்துள்ளது.
மேடைகளில் உங்கள் ரசிகர்கள் முன்பு பேசுவதற்கும், உங்கள் நிஜம் எது என்பதை நானும், என் கணவர் விக்னேஷ் சிவனும் நன்கு அறிவோம். இதே ஆவணப்படம் தொடர்பாக நான் நடித்த பல படங்களின் தயாரிப்பார்களை அனுகினோம். அவர்கள் மிகுந்த அன்போடு ஆதரித்தார்கள். இதுதான் மற்றவர்களுக்கும், உங்களுக்குமான வித்தியாசம்
போலியான முகமூடி அணிந்து கொண்டு உங்களால் தான் வலம் வர முடியும். நானும் ரெளடி தான் படம் வெற்றி உங்களால் ஏற்க முடியவில்லை என சினிமாத்துறை வட்டாரம் மூலம் தெரிந்து கொண்டேன். எல்லா துறையிலும் வியாபார ரீதியான போட்டி இயல்பு தான். உங்களை போல பிரபலமான நடிகராக இருந்தாலும், தனிப்பட்ட வாழ்க்கையில் தலையிடுவதை மக்கள் ஏற்க மாட்டார்கள். என்று கூறியிருந்தார். நயன்தாராவின் இந்த கருத்து சினிமா வட்டாரத்தில் பரபரப்பை ஏற்படுத்தியது.
சமூகவலைதளங்களிலும் இது வைரலாக பேசப்பட்டுக் கொண்டிருக்கிறது. ஏற்கனவே கடந்த காலங்களில் பாடகி சுசித்ரா தனுஷ் மீது பல்வேறு விமர்சனங்களை வைத்திருந்தார். பலரது தனிப்பட்ட வாழ்க்கையில் தனுஷ் தலையிடுவதாக புகார் எழுந்தது. இந்நிலையில் நயன்தாராவின் இந்தப் பதிவுக்கு சினிமாத் துறையில் இருந்தும் ஆதரவுகள் வந்து கொண்டிருக்கின்றன. நடிகைகள் ஐஸ்வர்யா ராஜேஷ், ஸ்ருதி ஹாசன், பார்வதி (மரியான் படம்) நஸ்ரியா நசீம், அபிராமி, அனுபமா ஆகியோர் நயன்தாராவின் பதிவை லைக் செய்து அவருக்கு ஆதரவு தெரிவித்துள்ளனர்.
நயன்தாராவின் இன்ஸ்டாகிராம் பக்கத்தில் மட்டுமே அந்தப் பதிவை சுமார் 3.2 லட்சத்துக்கு மேற்பட்டோர் லைக் செய்துள்ளனர். இந்நிலையில் நயன்தாராவின் குற்றச்சாட்டுக்கு தனுஷ் விரைவில் பதில் அளிப்பார் என்று அவரின் வழக்கறிஞர் அருண் தெரிவித்துள்ளார்.
