அம்பாறை மாவட்டம், திருக்கோவில் பொலிஸ் பிரிவுக்குட்பட்ட வம்மியடி ஆற்றுப் பகுதியில் இருந்து, 5 கைக்குண்டுகள் மற்றும் ஆயுதங்களின் பாகங்கள் மீட்கப்பட்டுள்ளதாக பொலிஸார் தெரிவித்துள்ளனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.
அரச புலனாய்வுப் பிரிவினருக்கு கிடைத்த இரகசியத் தகவலின் அடிப்படையில், நேற்றையதினம் பொலிஸாருடன் இணைந்து சோதனை நடத்தப்பட்டது.
இந்த சோதனையின் போது, வம்மியடி ஆற்றுப் பகுதியில் உள்ள ஒரு மரத்தின் அடியில் மறைத்து வைக்கப்பட்டிருந்த நிலையில், இந்த கைக்குண்டுகள் மற்றும் ஆயுத பாகங்கள் கண்டெடுக்கப்பட்டன.
மீட்கப்பட்ட இடமானது, கடந்த காலத்தில் விடுதலைப் புலிகளின் கட்டுப்பாட்டில் இருந்த பகுதி என்றும், அங்கு அவர்களின் முகாம் ஒன்று அமைந்திருந்ததாகவும் கூறப்படுகிறது. இந்த ஆயுதங்கள் அந்த காலத்தைச் சேர்ந்தவையாக இருக்கலாம் என சந்தேகிக்கப்படுகிறது.
இந்த சம்பவம் குறித்து திருக்கோவில் பொலிஸார் தீவிர விசாரணை நடத்தி வருகின்றனர். இந்த கைக்குண்டுகள் மற்றும் ஆயுத பாகங்கள் யார் வைத்திருந்தார்கள், எதற்காக மறைத்து வைக்கப்பட்டன என்பது குறித்த மேலதிக தகவல்கள் விரைவில் வெளியாகும் என எதிர்பார்க்கப்படுகிறது.
