கால்பந்து உலகில் பெரும் அதிர்ச்சியையும், பரபரப்பையும் ஏற்படுத்திய சம்பவம்! லிவர்பூல் மற்றும் பௌர்ன்மௌத் அணிகளுக்கு இடையிலான பிரீமியர் லீக் கால்பந்து போட்டியில், பௌர்ன்மௌத் அணியின் நட்சத்திர வீரர் அன்டோயின் செமென்யோ (Antoine Semenyo) மீது இனவெறித் தாக்குதல் நடத்தப்பட்டுள்ளது. இந்த கொடூர சம்பவத்தை நிகழ்த்திய நபர் கைது செய்யப்பட்டு, அவருக்கு ஒரு அதிரடியான நிபந்தனை விதிக்கப்பட்டுள்ளது.
ஆட்டம் விறுவிறுப்பாக நடந்துகொண்டிருந்த போது, கூட்டத்தில் இருந்த ஒருவர் செமென்யோவை பார்த்து இனவெறி கருத்துக்களை தெரிவித்துள்ளார். செமென்யோ உடனடியாக நடுவரிடம் இந்த சம்பவத்தை தெரிவித்ததால், ஆட்டம் சிறிது நேரம் நிறுத்தப்பட்டது. இந்த சம்பவம் மைதானத்தில் இருந்த ரசிகர்களையும், வீரர்களையும் பெரும் அதிர்ச்சிக்குள்ளாக்கியது. உடனடியாக, அந்த நபர் மைதானத்தில் இருந்து வெளியேற்றப்பட்டார்.
மெர்சிசைடு காவல்துறையினர் (Merseyside Police) மேற்கொண்ட விரைவான நடவடிக்கையில், 47 வயதான அந்த நபர் கைது செய்யப்பட்டார். பின்னர், அவர் நிபந்தனைகளுடன் பிணையில் விடுவிக்கப்பட்டார். ஆனால், அவருக்கு ஒரு அதிரடியான நிபந்தனை விதிக்கப்பட்டுள்ளது. அதன்படி, இனிமேல் அவர் இங்கிலாந்தில் எந்தவிதமான கால்பந்துப் போட்டிகளிலும் கலந்துகொள்ளக்கூடாது, மேலும், எந்தவொரு கால்பந்து மைதானத்திற்கும் ஒரு மைல் தூரத்திற்குள் செல்லக்கூடாது என்று தடை விதிக்கப்பட்டுள்ளது.
இந்த சம்பவம் குறித்து செமென்யோ தனது சமூக வலைதளப் பக்கத்தில், “இந்த இரவு எனக்கு எப்போதும் நினைவில் இருக்கும். ஆனால், ஒருவரின் வெறுப்பு வார்த்தைகளால் அல்ல, ஒட்டுமொத்த கால்பந்து குடும்பமும் ஒன்றாக நின்று என்னை ஆதரித்ததால்” என்று கூறியுள்ளார். இந்த சம்பவம், கால்பந்தில் இனவெறிக்கு இடமில்லை என்பதை மீண்டும் ஒருமுறை உலகிற்கு உணர்த்தியுள்ளது.
