இன்னும் ஐந்து நாட்களில் ஜெனீவா மனித உரிமைகள் பேரவையின் 60வது அமர்வு தொடங்கவுள்ளது. இந்தச் சூழலில், இலங்கை தொடர்பான ஐக்கிய நாடுகள் சபையின் தீர்மானம் குறித்து பல தரப்பினரும் கருத்துக்களை வெளியிட்டு வருகின்றனர். குறிப்பாக, பொறுப்புக்கூறல் விவகாரத்தில் இலங்கையின் அரசாங்கங்கள் தொடர்ந்து தவறிழைத்து வருவதாகக் கடுமையான விமர்சனங்கள் முன்வைக்கப்படுகின்றன.
இலங்கையின் பொறுப்புக்கூறல் குறைபாடுகளுக்கு சான்றாக, யாழ்ப்பாணம் – செம்மணி சித்துப்பாத்தியில் உள்ள மனிதப் புதைகுழியின் அகழ்வுப் பணிகள் இன்றும் தொடர்ந்தன. இன்றைய அகழ்வாராய்ச்சியின் போது மேலும் 9 மனித எலும்புக்கூடுகள் கண்டெடுக்கப்பட்டுள்ளன.
இதன் மூலம், செம்மணியில் இதுவரை கண்டெடுக்கப்பட்ட மனித எலும்புக்கூடுகளின் எண்ணிக்கை 231 ஆக அதிகரித்துள்ளது. இது, கடந்த காலங்களில் இடம்பெற்ற கொடூரங்களின் ஆழத்தையும், நீதிக்கான தேவை இன்னும் நிறைவேற்றப்படவில்லை என்பதையும் உணர்த்துகிறது.
