ஜம்மு-காஷ்மீரின் உதம்பூர் மாவட்டத்தில் இன்று (24) பாதுகாப்புப் படையினருக்கும் தீவிரவாதிகளுக்கும் இடையே கடுமையான துப்பாக்கிச் சூடு இடம்பெற்று வருவதாக வெளியாகியுள்ள செய்திகள் அப்பகுதியில் பதற்றத்தை அதிகரித்துள்ளது. உதம்பூர் மாவட்டத்தில் பதுங்கியிருந்த பயங்கரவாதிகள் நடத்திய திடீர் தாக்குதலில் துரதிர்ஷ்டவசமாக ஒரு இராணுவ வீரர் வீரமரணம் அடைந்துள்ளார். இதனைத் தொடர்ந்து பாதுகாப்புப் படைகளும் பதிலடி தாக்குதல் நடத்தியதாக இந்திய இராணுவம் தெரிவித்துள்ளது.
பஹல்காம் பகுதியில் 26 சுற்றுலாப் பயணிகளின் உயிரைப் பறித்த கொடூரமான பயங்கரவாதத் தாக்குதல் நடந்து இரண்டு நாட்களே ஆன நிலையில், உதம்பூரில் இந்த புதிய மோதல் வெடித்துள்ளது. உதம்பூர் பகுதியில் தீவிரவாதிகள் நடமாட்டம் குறித்து இந்திய இராணுவத்திற்கு கிடைத்த நம்பத்தகுந்த உளவுத்துறை தகவலின் அடிப்படையில், வெள்ளை நைட் கார்ப்ஸ் உடனடியாக செயல்பட்டு கூட்டு நடவடிக்கையைத் தொடங்கியதாக தெரிவிக்கப்படுகிறது.
இந்த மோதலின் தீவிரத்தன்மை மற்றும் உயிரிழப்புகள் குறித்த மேலும் தகவல்கள் இன்னும் முழுமையாக வெளியாகவில்லை. எனினும், தொடர்ச்சியாக நடைபெறும் இந்த பயங்கரவாத சம்பவங்கள் காஷ்மீரின் அமைதிக்கு பெரும் சவாலாக விளங்குகின்றன. பாதுகாப்புப் படையினர் தீவிரவாதிகளை ஒடுக்கும் முயற்சியில் தீவிரமாக ஈடுபட்டுள்ள நிலையில், அப்பகுதி மக்கள் அச்சத்துடன் உறைந்து போயுள்ளனர்.
பஹல்காம் தாக்குதலின் அதிர்ச்சியில் இருந்து மீள்வதற்குள் உதம்பூரில் நிகழ்ந்துள்ள இந்த துப்பாக்கிச் சூடு சம்பவம், காஷ்மீரில் பாதுகாப்பு மேலும் பலப்படுத்தப்பட வேண்டியதன் அவசியத்தை உணர்த்துகிறது. உயிரிழந்த இராணுவ வீரரின் குடும்பத்திற்கு நாடு முழுவதும் இரங்கல் தெரிவித்து வரும் நிலையில், பயங்கரவாதத்தை வேரறுக்க கடுமையான நடவடிக்கைகள் எடுக்கப்பட வேண்டும் என்ற கோரிக்கையும் வலுத்து வருகிறது.