இரு விரல் பரிசோதனையை தடை செய்ய வேண்டும்; தமிழக அரசுக்கு கோர்ட் உத்தரவு

இந்த செய்தியை பகிருங்கள்

புதுக்கோட்டை மாவட்டத்தை சேர்ந்தவர் டெய்லர் ராஜீவ் காந்தி. இவர் தையல் பயிற்சிக்கு வந்த 16 வயது சிறுமியுடன் அடிக்கடி போனில் பேசி பழகி பின்னர் பாலியல் பலாத்காரம் செய்துள்ளார். இது குறித்த புகாரின் பேரில் மாத்தூர் போலீசார் வழக்கு பதிவு செய்தனர்.

இந்த வழக்கை புதுக்கோட்டை மாவட்ட மகிளா நீதிமன்றம், விசாரணை நடத்தி, போக்சோ சட்டத்தின் கீழ் ராஜீவ் காந்திக்கு சாகும் வரை ஆயுள் தண்டனையும், அபராதமும் விதித்து உத்தரவிட்டது. இந்த தண்டனையை எதிர்த்து ராஜீவ்காந்தி உயர்நீதிமன்றம் மதுரைக்கிளையில் மேல் முறையீடு மனு தாக்கல் செய்தார். இந்நிலையில், இந்த வழக்கு நீதிபதிகள் சுப்ரமணியன் மற்றும் சதீஷ்குமார் அமர்வு முன்பு விசாரணைக்கு வந்தது.

அப்போது நீதிபதிகள் பிறப்பித்த உத்தரவில்;

கீழமை நீதிமன்றத்தில் விதிக்கப்பட்ட ஆயுள் தண்டனையை குறைத்து 20 ஆண்டுகள் கடுங்காவல் சிறைத்தண்டனை விதித்தனர். மேலும் ரூ.1 லட்சம் அபராதமும், தவறினால் 3 மாத சிறைத்தண்டனையும் உறுதி செய்து உத்தரவிட்டனர்.

பாலியல் பலாத்காரத்திற்கு ஆளான சிறுமிகளுக்கு, மருத்துவர்கள் இரண்டு விரல் சோதனை நடத்துவது தற்போது வழக்கமாக உள்ளது. இந்த சோதனை குழந்தையின் கண்ணியத்தை கேலி செய்யும் விதமாக உள்ளது என கூறினர். மேலும், போக்சோ சட்டத்தின் கீழ் பாதிக்கப்படும் சிறுமிகளுக்கு இந்த சோதனை நடத்தப்படுகிறது. இந்த சோதனை அரசியல் சட்டத்திற்கு முரணானது எனவும் பல மாநில அரசுகள் பாதிக்கப்பட்ட சிறுமிக்கு இரண்டு விரல் சோதனை நடத்துவதை தடை செய்துள்ளன என்பதையும் நீதிபதிகள் சுட்டிக்காட்டினர்.

அத்துடன் உச்ச நீதிமன்றம் இந்த நடைமுறையை தடை செய்துள்ளது. மேலும், இரண்டு விரல் சோதனை என்பது பாலியல் வன்கொடுமையால் பாதிக்கப்பட்ட சிறுமிக்கு நடத்தப்படும் மிகவும் அறிவியலற்ற பரிசோதனை முறையாகும்.

இது பாதிக்கப்பட்டவரின் தனியுரிமை உடல், மன ஒருமைப்பாடு மற்றும் கண்ணியத்திற்கான உரிமையை மீறுகிறது.

எனவே, பாலியல் குற்றங்களால் பாதிக்கப்பட்ட சிறுமிகளுக்கு மருத்துவர்களால் நடத்தப்படும் இரு விரல் பரிசோதனை செய்யும் நடைமுறையை உடனடியாகத் தடை செய்ய வேண்டும் என தமிழக அரசுக்கு நீதிபதிகள் உத்தரவிட்டனர்.


இந்த செய்தியை பகிருங்கள்

Contact Us