ரயிலில் கிரெனேடு குண்டை வெடிக்கப்போவதாக அச்சுறுத்திய ஒருவரைக் கண்டுபிடிப்பதற்காக பிரித்தானிய போலிஸார் அவசர தேடுதல் வேட்டையைத் தொடங்கியுள்ளனர். இந்தச் சம்பவம் பயணிகள் மத்தியில் பெரும் பீதியையும் அதிர்ச்சியையும் ஏற்படுத்தியுள்ளது.
பிரித்தானிய போக்குவரத்து போலிஸார் (British Transport Police – BTP) வெளியிட்ட தகவலின்படி, இந்தச் சம்பவம் கடந்த மே 18 ஆம் தேதி ஞாயிற்றுக்கிழமை மாலை 4:40 மணியளவில் ஸ்கெக்னஸ்ஸிலிருந்து நாட்டிங்ஹாமிற்குச் சென்றுகொண்டிருந்த ஒரு ரயிலில் நிகழ்ந்துள்ளது.
ரயில் காவலர் ஒருவர், தகாத வார்த்தைகளைப் பயன்படுத்திய ஒரு நபரை அணுகி நிறுத்துமாறு கேட்டுள்ளார். அதற்கு பதிலளிக்கும் விதமாக, அந்த நபர் தனது பையிலிருந்து ஒரு கிரெனேடு குண்டை எடுத்து, அதன் சேஃப்டி பின்னை (pin) அகற்றியுள்ளார். அதிர்ஷ்டவசமாக, அந்தக் கிரெனேடு வெடிக்கவில்லை.
ஆரம்பத்தில், தான் வேடிக்கை செய்வதாக அந்த நபர் கூறியிருந்தாலும், தொடர்ந்து மற்ற பயணிகளிடம் அச்சுறுத்தும் விதமாக நடந்து கொண்டுள்ளார். பின்னர் அவர் பாஸ்டன் ரயில் நிலையத்தில் ரயிலில் இருந்து இறங்கிச் சென்றுள்ளார்.
இந்தச் சம்பவம் குறித்து விசாரணை நடத்திவரும் போலிஸார், குறித்த நபரைக் கண்டுபிடிப்பதற்காக சிசிடிவி காட்சிகளை வெளியிட்டுள்ளனர். “இந்த நபர் குறித்த தகவல் விசாரணையில் உதவக்கூடும் என நம்புகிறோம்” என்று போலிஸார் தெரிவித்துள்ளனர்.
இந்தச் சம்பவம் குறித்த ஏதேனும் தகவல் தெரிந்தாலோ, அல்லது படத்தில் உள்ள நபரை அடையாளம் கண்டாலோ, பிரித்தானிய போக்குவரத்து போலிஸாரை 61016 என்ற எண்ணுக்கு குறுஞ்செய்தி அனுப்பியோ அல்லது 0800 40 50 40 என்ற எண்ணை அழைத்தோ தொடர்பு கொள்ளுமாறு கேட்டுக்கொள்ளப்பட்டுள்ளது. அல்லது, குற்றத் தடுப்பு அமைப்பு (Crimestoppers) மூலமாக 0800 555 111 என்ற எண்ணில் அநாமதேயமாகவும் தகவல் தெரிவிக்கலாம்.