அமெரிக்கா மத்திய கிழக்குப் போரில் இணையுமா என்ற பல நாட்கள் ஊகங்களுக்குப் பிறகு, இஸ்ரேலின் குண்டுவீச்சு நடவடிக்கையில் இணைந்து, ஈரானின் மூன்று அணுசக்தி தளங்கள் மீது அமெரிக்கா தாக்குதல்களை நடத்தியுள்ளது.“ஈரானின் முக்கிய அணுசக்தி செறிவூட்டும் வசதிகள் முழுமையாக அழிக்கப்பட்டுவிட்டன. மத்திய கிழக்கின் தாதாவான ஈரான் இப்போது அமைதியை ஏற்படுத்த வேண்டும்” என்று தாக்குதல்களுக்குப் பின்னர் வெள்ளை மாளிகையிலிருந்து நாட்டு மக்களுக்கு ஆற்றிய தொலைக்காட்சி உரையில் அமெரிக்க அதிபர் ட்ரம்ப் தெரிவித்தார். இந்தத் தாக்குதல் மத்திய கிழக்கில் ஒரு புதிய மற்றும் ஆபத்தான திருப்பத்தை ஏற்படுத்தியுள்ளது.
இந்தத் தாக்குதல் குறித்து உலக நாடுகள் பலவும் உடனடியாக எதிர்வினையாற்றியுள்ளன. இஸ்ரேலியப் பிரதமர் பெஞ்சமின் நெதன்யாகு, இந்தத் தாக்குதல்கள் “மத்திய கிழக்கு மற்றும் அதற்கு அப்பால் செழிப்பான மற்றும் அமைதியான எதிர்காலத்திற்கு வழிவகுக்கும்” என்று கூறி ட்ரம்பிற்கு வாழ்த்து தெரிவித்தார். “ஈரானின் அணுசக்தி வசதிகளை அமெரிக்காவின் வலிமையால் குறிவைத்த உங்கள் துணிச்சலான முடிவு வரலாற்றை மாற்றும்” என்று நெதன்யாகு ஒரு வீடியோ செய்தியில் குறிப்பிட்டார். பிரித்தானியப் பிரதமர் கீர் ஸ்டார்மர், “ஈரான் ஒருபோதும் அணு ஆயுதத்தை உருவாக்க அனுமதிக்கப்படக்கூடாது, மேலும் அமெரிக்கா அந்த அச்சுறுத்தலைத் தணிக்க நடவடிக்கை எடுத்துள்ளது” என்று கூறி, ஈரானை பேச்சுவார்த்தை மேசைக்குத் திரும்புமாறு அழைப்பு விடுத்தார். ஐரோப்பிய ஒன்றியத்தின் உயர்மட்ட இராஜதந்திரி கஜா கல்லாஸ், மோதலைத் தணித்து பேச்சுவார்த்தைக்குத் திரும்புமாறு அனைத்து தரப்பினரையும் வலியுறுத்தினார்.
ஐ.நா. பொதுச்செயலாளர் அன்டோனியோ குட்டரெஸ், இந்தத் தாக்குதல்களை “ஏற்கனவே விளிம்பில் உள்ள ஒரு பிராந்தியத்தில் ஒரு ஆபத்தான மோதல் அதிகரிப்பு” என்று வர்ணித்தார். “இந்த ஆபத்தான நேரத்தில், குழப்பத்தின் சுழற்சியைத் தவிர்ப்பது மிகவும் முக்கியம். இராணுவ தீர்வு இல்லை. ஒரே வழி இராஜதந்திரம். ஒரே நம்பிக்கை அமைதி” என்று அவர் ஒரு அறிக்கையில் கூறினார். ஈராக்கின் அரசாங்க செய்தித் தொடர்பாளர் பாசிம் அலாவதி, அமெரிக்கத் தாக்குதல்கள் மத்திய கிழக்கில் அமைதி மற்றும் பாதுகாப்புக்கு கடுமையான அச்சுறுத்தலை ஏற்படுத்துவதாக எச்சரித்தார். சவுதி அரேபியா, “பெரும் கவலை” தெரிவித்ததோடு, மோதலைத் தணிக்கவும், மேலும் அதிகரிப்பதைத் தவிர்க்கவும் அனைத்து முயற்சிகளையும் மேற்கொள்ளுமாறு வலியுறுத்தியது. பாலஸ்தீனப் போராளிக் குழு ஹமாஸ், இந்தத் தாக்குதலை “சர்வதேச சட்டத்தின் அப்பட்டமான மீறல் மற்றும் சர்வதேச அமைதி மற்றும் பாதுகாப்பிற்கு நேரடி அச்சுறுத்தல்” என்று கண்டித்தது. அமெரிக்க பிரதிநிதிகள் சபையின் உயர்மட்ட ஜனநாயகக் கட்சித் தலைவர் ஹக்கீம் ஜெஃப்ரிஸ், ட்ரம்ப் அமெரிக்காவை போரை நோக்கித் தள்ளுவதாகவும், “ஒருதலைப்பட்சமான இராணுவ நடவடிக்கையால் ஏற்படும் எந்தவொரு எதிர்மறையான விளைவுகளுக்கும் டொனால்ட் ட்ரம்பே முழுப் பொறுப்பு” என்றும் குற்றம் சாட்டினார். இந்தத் தாக்குதல்கள் சர்வதேச அளவில் பெரும் தாக்கத்தை ஏற்படுத்தியுள்ளன.
