இறக்கும் முன் ஒருமுறை பார்க்க வேண்டும்!” – மகளுக்குத் தாமஸ் மார்க்கலின் உருக்கமான இறுதி வேண்டுகோள்: காலையே அகற்றினாலும் மெகன் பேசவில்லை என அதிர்ச்சி தகவல்.
பிரித்தானிய இளவரசர் ஹாரியின் மனைவி மெகன் மார்க்கலின் (Meghan Markle) தந்தை தாமஸ் மார்க்கல், காலில் ஏற்பட்ட ஆபத்தான இரத்தக் கட்டு காரணமாகக் காலின் ஒரு பகுதியை அவசரமாக அகற்றப்பட்ட நிலையில், மருத்துவமனையில் இருந்து தனது மகளுக்கு ஒரு உருக்கமான மற்றும் இறுதி வேண்டுகோளை விடுத்துள்ளார்.
உயிர் பிழைப்பதே கேள்விக்குறியாக இருக்கும் இந்தச் சூழலிலும், மெகன் தன்னைத் தொடர்புகொள்ளவே இல்லை என்று அவர் கூறியது அரச குடும்ப வட்டாரத்தில் பெரும் பரபரப்பை ஏற்படுத்தியுள்ளது.
மரணத்தின் விளிம்பில் காலையே இழந்த தந்தை!
81 வயதான தாமஸ் மார்க்கல், கடந்த சில மாதங்களுக்கு முன் மெக்சிகோவில் இருந்து பிலிப்பைன்ஸுக்குக் குடியேறினார். சமீபத்தில் அவருக்கு இரத்த ஓட்டம் தடைபட்டதனால் இடது கால் நீலம் மற்றும் கருப்பு நிறமாக மாறியது.
அவசர அறுவை சிகிச்சை: உயிரைக் காப்பாற்ற வேறு வழியில்லாததால், மருத்துவர்கள் தாமஸின் இடது முழங்காலுக்குக் கீழே உள்ள பகுதியை அகற்றினர். “இது வாழ்வா சாவா என்ற நிலை” என்று தாமஸின் மகன் தாமஸ் மார்க்கல் ஜூனியர் இந்த அறுவை சிகிச்சையின் தீவிரத்தை விவரித்தார்.
தீவிர சிகிச்சை பிரிவில்: மூன்று மணி நேரத்திற்கும் மேலாக நீடித்த இந்தச் சிகிச்சைக்குப் பிறகு, தாமஸ் மார்க்கல் தற்போது தீவிர சிகிச்சைப் பிரிவில் (ICU) ஆபத்தான நிலையிலேயே உள்ளார். தொற்று அபாயம் இருப்பதால் அடுத்த சில நாட்கள் மிக முக்கியம் என மருத்துவர்கள் கூறியுள்ளனர்.
மெகன் ‘பேசவில்லை’ என வேதனை!
“ஒருமுறை உன்னைப் பார்க்க வேண்டும்” எனச் செய்தி வெளியிட்டதையடுத்து, மெகன் தரப்பிலிருந்து ஒரு பரபரப்பான தகவல் வெளியானது. “தாமஸ் மார்க்கலை மெகன் அணுகியுள்ளார் (Reached Out)” என அவரது செய்தித் தொடர்பாளர் உறுதிப்படுத்தினார்.
ஆனால், இதற்குப் பதிலளித்த தாமஸ் மார்க்கல் மருத்துவமனையில் இருந்தபடியே, “மெகன் என்னைத் தொடர்பு கொள்ளவே இல்லை” என்று கூறி, அவரது செய்தித் தொடர்பாளர் கூற்றை முற்றிலுமாக மறுத்துள்ளார். “எனது பேரன் ஆர்ச்சி மற்றும் பேத்தி லிலிபெட் ஆகியோரைப் பார்க்க விரும்புகிறேன். மெகனுடன் பிரிந்து வாழும் நிலையில் இறந்துபோக நான் விரும்பவில்லை. அவள் கணவனையும் பார்க்க ஆசையாக இருக்கிறது!” என்று அவர் உருக்கமான வேண்டுகோளை விடுத்துள்ளார்.
ஏழு ஆண்டுப் பகை!
மெகன் மார்க்கல் தனது திருமணத்திற்கு முன்பாக (2018-ல்), தனது தந்தை பாப்பராஸி புகைப்படக்காரர்களுடன் சேர்ந்து போலி புகைப்படங்களை எடுத்து சர்ச்சையில் சிக்கியதால், இருவருக்கும் இடையேயான உறவு முறிந்தது. அதன் பின் ஏழு ஆண்டுகளாக இருவரும் பேசிக்கொள்வது இல்லை.
இந்தச் சூழலில், தனது தந்தை மரணத்தின் விளிம்பில் இருக்கும்போதும் மெகன் மார்க்கல் அவரைச் சந்திக்கவோ அல்லது பேசவோ முயற்சிக்காதது, மனிதாபிமானமற்ற செயல் எனப் பல தரப்பிலும் விமர்சனம் எழுந்துள்ளது.