பெங்களூரு: நடிகர் மற்றும் தயாரிப்பாளர் கமல்ஹாசன் நடிப்பில் உருவாகியுள்ள ‘தக் லைஃப்’ திரைப்படம் கர்நாடகாவில் வெளியாவதில் பெரும் சிக்கலை சந்தித்துள்ளது. “கன்னட மொழி தமிழிலிருந்து பிறந்தது” என்று கமல்ஹாசன் ஒரு நிகழ்ச்சியில் தெரிவித்த கருத்து, பெரும் சர்ச்சையை கிளப்பியது. இதனையடுத்து, பல கன்னட அமைப்புகள் ‘தக் லைஃப்’ படத்திற்கு தடை விதிக்கக் கோரி போராட்டம் நடத்தி வருகின்றன.
நிலைமை விஸ்வரூபம் எடுத்ததையடுத்து, கர்நாடக திரைப்பட வர்த்தக சங்கம் (KFCC), கமல்ஹாசன் மன்னிப்பு கேட்காவிட்டால் படத்தை திரையிட அனுமதிக்க மாட்டோம் என மிரட்டியது. இந்த அச்சுறுத்தல்களுக்கு மத்தியில், தனது படத்திற்கு பாதுகாப்பு கோரி கமல்ஹாசன் கர்நாடக உயர் நீதிமன்றத்தில் மனு தாக்கல் செய்துள்ளார்.
ராஜ்கமல் பிலிம்ஸ் இன்டர்நேஷனல் சார்பில் தாக்கல் செய்யப்பட்ட இந்த மனுவில், கர்நாடக அரசு, காவல்துறை மற்றும் திரைப்பட வர்த்தக அமைப்புகள் ‘தக் லைஃப்’ படத்தின் வெளியீட்டைத் தடுக்கக் கூடாது என்றும், படத்தை திரையிட திட்டமிடும் திரையரங்குகளுக்கு உரிய போலீஸ் பாதுகாப்பு வழங்க வேண்டும் என்றும் கோரப்பட்டுள்ளது.
இந்த சட்ட நடவடிக்கை, போராட்டம் நடத்தி வரும் கன்னட அமைப்புகளை அதிர்ச்சிக்குள்ளாக்கியுள்ளதாகக் கூறப்படுகிறது. நீதிமன்றத்தின் முடிவை அவர்கள் பதற்றத்துடன் எதிர்பார்த்து வருகின்றனர். இந்த சர்ச்சை, படத்தின் வெளியீட்டிற்கு முன்னதாகவே பெரும் கவனத்தை ஈர்த்துள்ளது. ‘தக் லைஃப்’ திரைப்படம் ஜூன் 5ஆம் தேதி வெளியாக உள்ள நிலையில், கர்நாடகாவில் இந்த விவகாரம் பெரும் பரபரப்பை ஏற்படுத்தியுள்ளது. கர்நாடக திரைப்பட வர்த்தக சங்கம் படத்தை திரையிட மாட்டோம் என்று உறுதியாக கூறி வரும் நிலையில், நீதிமன்றத்தின் தீர்ப்பு பெரும் எதிர்பார்ப்பை ஏற்படுத்தியுள்ளது.