சூப்பர் ஸ்டார் ரஜினிகாந்த் நடிப்பில் உருவாகியுள்ள ‘கூலி’ படத்தின் விளம்பரப் பணிகளில் பிசியாக இருக்கும் இயக்குநர் லோகேஷ் கனகராஜ், தான் படித்த பிஎஸ்ஜி கல்லூரிக்குச் சென்று மாணவர்களிடையே உரையாற்றினார். நிகழ்ச்சியில் பல சுவாரஸ்யமான விஷயங்களைப் பகிர்ந்துகொண்ட லோகேஷ், தனது புகழ்பெற்ற சினிமாட்டிக் யூனிவர்ஸ் (LCU) குறித்தும் பேசினார். அப்போது அவர் விஜய்யைப் பற்றிக் குறிப்பிட்டது இணையத்தில் பெரும் விவாதத்தை கிளப்பியுள்ளது.
“விஜயண்ணா இல்லாமல் எல்சியூ முழுமையடையாது!”
“விஜயண்ணா இல்லாமல் எல்சியூ இல்லை. ஆனால், அவர் உள்ளே வருவாரா இல்லையா என்பதை நீங்கள் தான் அவரிடம் கேட்க வேண்டும். ஏனென்றால், இன்று அவரது பாதை வேறு இடத்தில் உள்ளது. அதெல்லாம் உங்களுக்கே தெரியும். ஆனால், விஜயண்ணா இல்லாமல் எல்சியூ முழுமையடையாது,” என்று லோகேஷ் கனகராஜ் உணர்வுபூர்வமாகத் தெரிவித்துள்ளார்.
லோகேஷின் இந்த வெளிப்படையான பேச்சு சமூக வலைத்தளங்களில் வைரலாகப் பரவி வருகிறது. விஜய் ரசிகர்கள் இந்த வார்த்தைகளைக் கேட்டு உணர்ச்சிவசப்பட்டுள்ளனர். ‘மாஸ்டர்’ மற்றும் ‘லியோ’ என லோகேஷ் இயக்கத்தில் விஜய் நடித்த இரு படங்களும் மிகப்பெரிய வெற்றிகளைப் பெற்ற நிலையில், எல்சியூவில் விஜய் இணைவது குறித்து நீண்டகாலமாகவே எதிர்பார்ப்பு நிலவி வருகிறது.
லோகேஷ் சினிமாட்டிக் யூனிவர்ஸ் – ஒரு பார்வை!
லோகேஷ் கனகராஜ் தனக்கென ஒரு தனித்துவமான சினிமாட்டிக் யூனிவர்ஸை உருவாக்கி, அதன் கீழ் படங்களை இயக்கி வருகிறார். அவரது இரண்டாவது படமான ‘கைதி’யில் இருந்து, ‘விக்ரம்’, ‘லியோ’ போன்ற படங்கள் வரை ஒவ்வொன்றையும் ஒரு தொடர்புடன் உருவாக்கி வருகிறார். இதனால், அவரது எல்சியூவுக்கு என்றே ஒரு தனி ரசிகர் பட்டாளம் உருவாகியுள்ளது.
தற்போது விஜய்யின் அரசியல் நகர்வுகள் காரணமாக அவர் சினிமாவை விட்டு விலகுவார் என்ற பேச்சுகள் அடிபட்டு வரும் நிலையில், லோகேஷ் கனகராஜின் இந்தக் கருத்து, எல்சியூவில் விஜய் இணைவது குறித்து புதிய எதிர்பார்ப்புகளை கிளப்பியுள்ளது. ‘கூலி’ படத்தின் புரோமோஷனுக்காக லோகேஷ் கனகராஜ் பேசிவரும் பல விஷயங்கள், ரசிகர்களிடையே பெரும் ஆர்வத்தைத் தூண்டி வருவது குறிப்பிடத்தக்கது.
லோகேஷின் எல்சியூவில் தளபதி விஜய் மீண்டும் இணைவாரா?
