இயக்குநர் வெற்றிமாறன், தனது ‘விசாரணை’ படம் குறித்து பல அதிர்ச்சிகரமான தகவல்களை வெளியிட்டுள்ளார். அதே சமயம், அந்தப் படத்தின் தயாரிப்பாளரான நடிகர் தனுஷின் பெருந்தன்மை குறித்தும் அவர் மனம் திறந்து பேசியுள்ளார்.
‘விசாரணை’ படத்திற்குத் தானும், நடிகர் தினேஷ், இசையமைப்பாளர் ஜி.வி. பிரகாஷ் மற்றும் கிஷோர் உட்படப் பலரும் சம்பளம் வாங்கவில்லை என்று வெற்றிமாறன் தெரிவித்துள்ளார். இந்தப் படத்தின் மொத்த செலவும் ரூ. 2.75 கோடி தான் என்றும், நடிகர் சமுத்திரக்கனி மட்டும் ரூ. 5 லட்சம் சம்பளமாகப் பெற்றார் என்றும் அவர் கூறியுள்ளார்.
“இந்தப் படத்திற்கு ரூ. 2.5 கோடி தேவைப்படும்” என தனுஷிடம் கேட்டபோது, கதை கேட்காமல் உடனே அந்தப் பணத்தை அவர் கொடுத்தார். மேலும், இந்தப் படம் ஆஸ்கர் விருதுக்கு அனுப்பப்பட்டபோது, அதற்கான விளம்பரச் செலவுகளுக்காக தனுஷ் ரூ. 3.5 கோடி செலவழித்தார். ஆனால், ‘விசாரணை’ படத்தின் மொத்த வசூலே ரூ. 3.85 கோடிதான். இவ்வளவு பெரிய மனதுடன் ஒரு தயாரிப்பாளர் கிடைப்பது அரிது,” என்று வெற்றிமாறன் தனுஷைப் பாராட்டியுள்ளார்.
சமீபத்தில் ஒரு நிகழ்ச்சியில் பேசிய வெற்றிமாறன், தான் அடுத்ததாக நடிகர் சிம்புவை வைத்து ஒரு படம் இயக்க இருப்பதாகவும், மேலும், அவர் சூர்யாவுடன் இணைந்து செய்ய இருந்த ‘வாடிவாசல்’ திரைப்படம் தற்போதைக்குத் தாமதமாகியுள்ளது என்பதையும் அவர் குறிப்பிட்டுள்ளார்.
