யாழ்ப்பாணம், அரியாலை செம்மணி சித்துபாத்தி இந்து மயானப் பகுதியில் மேற்கொள்ளப்பட்டு வரும் இரண்டாம் கட்ட மனிதப் புதைகுழி அகழ்வுப் பணிகளில், மேலும் 5 மனித எச்சங்கள் அடையாளம் காணப்பட்டுள்ளது. இதன் மூலம் இந்த மனிதப் புதைகுழியில் கண்டறியப்பட்ட மொத்த மனித எச்சங்களின் எண்ணிக்கை தொடர்ந்து அதிகரித்து வருகிறது.
யாழ்ப்பாண நீதவான் நீதிமன்ற நீதிபதி ஏ.ஏ.ஆனந்தராஜா முன்னிலையில், தொல்லியல் துறை பேராசிரியர் ராஜ் சோமதேவா மற்றும் சட்டவைத்திய அதிகாரி செல்லையா பிரணவன் ஆகியோரின் மேற்பார்வையில் இந்த அகழ்வுப் பணிகள் தொடர்ந்து முன்னெடுக்கப்பட்டு வருகின்றன. கடந்த சில நாட்களாக நடைபெற்று வரும் அகழ்வாராய்ச்சியில் பல புதிய தடயங்கள் வெளிப்பட்டு வருவதாகக் கூறப்படுகிறது.
ஆரம்பகட்ட அகழ்வின்போதே பல மனித எலும்புக்கூடுகள் கண்டுபிடிக்கப்பட்ட நிலையில், இந்தப் பகுதி ஒரு மனிதப் புதைகுழியாகப் பிரகடனப்படுத்தப்பட்டு, விரிவான அகழ்வுப் பணிகளுக்கு உத்தரவிடப்பட்டது. தற்போது, அடையாளம் காணப்பட்டுள்ள இந்த 5 எச்சங்களும் அகழ்ந்து எடுக்கப்பட்டு, மேலதிக ஆய்வுகளுக்காகப் பாதுகாப்பாக வைக்கப்பட்டுள்ளன.
இந்த எலும்புக்கூடுகள் குழப்பமான முறையில் புதைக்கப்பட்டுள்ளதாகவும், உடைகளோ அல்லது தனிப்பட்ட அணிகலன்களோ எதுவும் கண்டெடுக்கப்படவில்லை என்றும் சட்ட வைத்திய அதிகாரி மற்றும் தொல்லியல் நிபுணர்கள் நீதிமன்றத்தில் சமர்ப்பித்த அறிக்கைகளில் குறிப்பிட்டிருந்தனர். இது சட்டவிரோதமான அல்லது இரகசியமான புதைகுழியாக இருக்கலாம் என்ற சந்தேகத்தையும் எழுப்பியுள்ளது.
அகழ்வுப் பணிகள் தொடர்ந்து மேற்கொள்ளப்பட வேண்டும் என நீதிமன்றம் உத்தரவிட்டுள்ள நிலையில், நிதி ஒதுக்கீடு தொடர்பாகவும் நீதி அமைச்சகத்திடம் கோரிக்கை விடுக்கப்பட்டுள்ளது. இந்த அகழ்வுப் பணிகள் நிறைவடைந்த பின்னரே, இந்தப் புதைகுழியின் பின்னணி மற்றும் அதில் உள்ள மனித எச்சங்கள் குறித்த முழுமையான தகவல்கள் வெளிவரும் என எதிர்பார்க்கப்படுகிறது.
