யாழ்ப்பாணத்தில் உள்ள இந்திய துணை தூதரகத்திற்கு அருகே உள்ள குளத்தில் இருந்து ஆணொருவரின் சடலம் வெள்ளிக்கிழமை (ஆகஸ்ட் 8) மீட்கப்பட்டுள்ளது. இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
சடலமாக மீட்கப்பட்டவர் யார் என்று இதுவரை அடையாளம் காணப்படவில்லை. இறந்தவர் வெள்ளை, சிவப்பு மற்றும் கருப்பு நிறங்களில் கட்டம் போட்ட சட்டை அணிந்திருந்தார். மேலும், அவரது சைக்கிள் குளத்திற்கு வெளியே காணப்பட்டுள்ளது.
சடலத்தை மீட்டு யாழ்ப்பாணம் போதனா வைத்தியசாலையில் வைத்துள்ளனர். திடீர் மரண விசாரணை அதிகாரி நமசிவாயம் பிரேம்குமார் விசாரணைகளை மேற்கொண்டார். பொதுமக்கள் யாரும் இந்தச் சடலத்தை அடையாளம் காண முடிந்தால், மருத்துவமனையுடன் தொடர்புகொண்டு அடையாளம் காட்டுமாறு கோரிக்கை விடுக்கப்பட்டுள்ளது.
இந்த மர்ம மரணம் குறித்து போலீசார் தீவிர விசாரணை நடத்தி வருகின்றனர்.
