சினிமா பாணியில் மோதல்! ஒக்டோபர் 13 வரை விளக்கமறியலில் உத்தரவு!
Mt Lavania நீதவான் நீதிமன்ற வளாகத்திலேயே ஒரு சட்டத்தரணியை பொலிஸ் கான்ஸ்டபிள் ஒருவர் தாக்கிய சம்பவம் பெரும் பரபரப்பை ஏற்படுத்தியுள்ளது. இச்சம்பவம் தொடர்பாக குறித்த பொலிஸ் அதிகாரி ஒக்டோபர் 13ஆம் திகதி வரை விளக்கமறியலில் வைக்கப்பட்டுள்ளார்.
நீதிமன்றத்தில் தனது வழக்கை முடித்துக்கொண்டு சட்டத்தரணி ஒருவர் தனது வாகனத்தை நீதிமன்ற வளாகத்தில் இருந்து வெளியே எடுக்க முயன்றுள்ளார். அதே நேரத்தில் சிறைச்சாலைக்குரிய பேருந்து (Prison Bus) ஒன்று நீதிமன்றத்திற்குள் வந்ததால், அங்கு கடமையில் இருந்த பொலிஸ் கான்ஸ்டபிள், “பேருந்து உள்ளே வரும் வரை நீங்கள் காத்திருக்க வேண்டும்” என்று சட்டத்தரணியிடம் கூறியுள்ளார்.
இதையடுத்து, இருவருக்கும் இடையே வாக்குவாதம் ஏற்பட்டுள்ளது. இந்த வாய்த்தகராறு விரைவிலேயே கைகலப்பாக மாறியதாகவும், அப்போது பொலிஸ் அதிகாரி சட்டத்தரணியை தாக்கியதாகவும் தகவல்கள் தெரிவிக்கின்றன.
இந்தச் சம்பவத்தைத் தொடர்ந்து, பொலிஸ் கான்ஸ்டபிள் கைது செய்யப்பட்டு, Mt Lavania நீதவான் நீதிமன்றத்தில் ஆஜர்படுத்தப்பட்டார். நீதவான் பசன் அமரசேகர (Pasan Amarasekara) குறித்த பொலிஸ் அதிகாரியை எதிர்வரும் ஒக்டோபர் 13ஆம் திகதி வரை விளக்கமறியலில் வைக்குமாறு உத்தரவிட்டார்.
இலங்கை சட்டத்தரணிகள் சங்கம் கண்டனம்!
இச்சம்பவத்திற்கு இலங்கை சட்டத்தரணிகள் சங்கம் (BASL) கடும் கண்டனம் தெரிவித்துள்ளது. இந்த தாக்குதல் “விளக்க முடியாதது” என்று குறிப்பிட்டுள்ள சங்கம், பொதுமக்கள் மீது பொலிஸார் பலத்தைப் பிரயோகிப்பதை ஒருபோதும் ஏற்றுக்கொள்ள முடியாது என்று வலியுறுத்தியுள்ளது.
இலங்கை சட்டத்தரணிகள் சங்கம் வெளியிட்டுள்ள அறிக்கையில், “சம்பந்தப்பட்ட அதிகாரி தற்போது விளக்கமறியலில் வைக்கப்பட்டுள்ளார். இந்த விடயத்தை BASL நெருக்கமாக கண்காணிக்கும். இந்த சம்பவம் குறித்து நடவடிக்கை எடுக்குமாறும், எதிர்காலத்தில் இதுபோன்ற சம்பவங்கள் நடைபெறாமல் இருப்பதை உறுதிப்படுத்துமாறும் பொலிஸ் மா அதிபரை நாம் வலியுறுத்தியுள்ளோம்” என்று தெரிவிக்கப்பட்டுள்ளது.
