நடிகர் விஜய் கைது செய்யப்படுவாரா என்ற கேள்விக்கு, மூத்த அமைச்சரும் தி.மு.க.வின் பொதுச் செயலாளருமான துரைமுருகன் அவர்கள் வேலூரில் செய்தியாளர்களைச் சந்தித்தபோது பதிலளித்தார்.
விஜய் கைது குறித்து அமைச்சர் கருத்து:
செய்தியாளர்கள் எழுப்பிய கேள்விக்கு பதிலளித்த அமைச்சர் துரைமுருகன், “நாங்கள் யாரையும் தேவையில்லாமல் கைது செய்ய மாட்டோம். ஆனால், ஆதாரங்கள் இருந்து, தவிர்க்க முடியாத நிலை ஏற்பட்டால் (சட்டப்படி) கைது செய்வோம். எனவே, அவர்கள் வீண் பயத்துடன் எதையும் பேசிக்கொண்டிருக்கத் தேவையில்லை,” என்று திட்டவட்டமாகக் கூறினார்.
வாகனப் பறிமுதல் விவகாரம்: விஜய்யின் வாகனம் பறிமுதல் செய்யப்பட்டது தொடர்பாக நீதிமன்றம் கேள்வியெழுப்பியுள்ளது குறித்த கேள்விக்கு பதிலளித்த அவர், “அது தொடர்பாக புலனாய்வு விசாரணை நடந்து வருகிறது. இதில் எப்போது தேவையோ, அப்போது முதலமைச்சர் (ஸ்டாலின்) நடவடிக்கை எடுப்பார்,” என்று தெரிவித்தார்.
கட்சி கூட்டங்கள் குறித்த எச்சரிக்கை: விஜய்யின் கூட்டங்கள் மற்றும் கூட்ட நெரிசல் காரணமாக ஏற்படும் அசம்பாவிதங்கள் குறித்துப் பேசிய அமைச்சர், “எல்லாக் கட்சிகளுக்கும் தங்களுக்கு எவ்வளவு கூட்டம் வருமென்று தெரியும். அந்தக் கூட்டத்துக்கு ஏற்ப நிகழ்ச்சி நடத்தும் இடம் போதுமானதா என்பதை அவர்களே முடிவு செய்ய வேண்டும். அதிக கூட்டம் வரும் என்றால் ஏதாவது ஒரு மைதானத்தில் கூட்டம் வைத்திருக்கலாம். எனவே ஒவ்வொரு கட்சியும், அவர்களின் நிலைக்கு ஏற்ப முடிவு எடுக்க வேண்டும். இதுபோன்ற அசம்பாவிதங்கள் நடைபெறாமல் இருக்க என்ன செய்வது என்று நாங்கள் ஒரு கமிட்டி போடப் போகிறோம். அரசும் ஒரு குழு அமைக்க உள்ளது,” எனத் தெரிவித்தார்.
