ஜப்பானில் நடைபெற்ற குத்துச்சண்டை போட்டி ஒன்றில், இரண்டு இளம் வீரர்கள் மூளைக் காயம் காரணமாக அடுத்தடுத்து உயிரிழந்த சம்பவம், உலக குத்துச்சண்டை ரசிகர்களிடையே பெரும் சோகத்தையும், அதிர்ச்சியையும் ஏற்படுத்தியுள்ளது.
ஆகஸ்ட் 2-ம் தேதி டோக்கியோவில் உள்ள கோராகுவென் ஹாலில் நடந்த குத்துச்சண்டை போட்டியில், ஷிகெடோஷி கோடாரி மற்றும் ஹிரோமாசா உரகாஃபா ஆகிய இரு வீரர்களும் வெவ்வேறு போட்டிகளில் பங்கேற்றனர்.
- ஷிகெடோஷி கோடாரி (28): யாமடோ ஹடாவுக்கு எதிரான 12 சுற்றுகள் கொண்ட போட்டி முடிந்த சில நிமிடங்களில் கோடாரி மயங்கி விழுந்தார். மூளையில் ரத்தக் கசிவு ஏற்பட்டதைக் கண்டறிந்த மருத்துவர்கள், அவருக்கு அவசர அறுவை சிகிச்சை செய்தனர். ஆனால், சிகிச்சை பலனின்றி ஆகஸ்ட் 8-ம் தேதி அவர் உயிரிழந்தார்.
- ஹிரோமாசா உரகாஃபா (28): யோஜி சைட்டோவுக்கு எதிரான போட்டியில், கடுமையான மூளைக் காயம் காரணமாக மயங்கி விழுந்த உரகாஃபா, கோடாரியைப் போலவே மூளை அறுவை சிகிச்சைக்கு உட்படுத்தப்பட்டார். ஆனால், துரதிர்ஷ்டவசமாக, ஆகஸ்ட் 9-ம் தேதி அவரும் உயிரிழந்தார்.
ஒரே போட்டியில், மூளைக் காயம் காரணமாக இரண்டு வீரர்கள் உயிரிழந்தது இதுவே ஜப்பானில் முதன்முறை என்று அந்நாட்டு குத்துச்சண்டை ஆணையம் தெரிவித்துள்ளது. இந்த சோகமான சம்பவத்தைத் தொடர்ந்து, இனிவரும் அனைத்து ஓபிபிஎஃப் (OPBF) பட்டப் போட்டிகளும் 12 சுற்றுகளுக்குப் பதிலாக 10 சுற்றுகளாகக் குறைக்கப்படும் என ஜப்பானிய குத்துச்சண்டை ஆணையம் அறிவித்துள்ளது.
இந்த இழப்பு, குத்துச்சண்டையின் பாதுகாப்பு அம்சங்கள் குறித்த கடுமையான விவாதங்களை மீண்டும் எழுப்பியுள்ளது. விளையாட்டு வீரர்களின் உயிரைப் பாதுகாக்க, குத்துச்சண்டை விதிகள் மற்றும் மருத்துவ பரிசோதனைகள் மேலும் கடுமையாக்கப்பட வேண்டும் என பலரும் கோரிக்கை விடுத்துள்ளனர்.
