அமெரிக்காவின் ஜனாதிபதி டொனால்ட் டிரம்ப், வெளிநாட்டு முதலீட்டாளர்களுக்கான “EB-5” விசா திட்டத்தை ஒரு புதிய “கோல்ட் கார்டு” மூலம் மாற்றுவதன் மூலம் அமெரிக்க குடியுரிமைக்கு வழிவகுக்கும் ஒரு திட்டத்தை செவ்வாய்க்கிழமை முன்மொழிந்தார். இந்த “கோல்ட் கார்டு” $5 மில்லியன் செலவில் வாங்கப்படும் என்றும், இது அமெரிக்க குடியுரிமைக்கு ஒரு வழியாக அமையும் என்றும் டிரம்ப் கூறினார்.
“EB-5” முதலீட்டாளர் விசா திட்டம், அமெரிக்காவில் பெரிய தொகையை முதலீடு செய்து வேலைவாய்ப்புகளை உருவாக்கும் அல்லது பாதுகாக்கும் வெளிநாட்டு முதலீட்டாளர்களுக்கு கிரீன் கார்டு (நிரந்தர குடியிருப்பு அனுமதி) வழங்குகிறது. இந்த திட்டத்தை டிரம்ப் “கோல்ட் கார்டு” மூலம் மாற்ற உத்தேசித்துள்ளார்.
டிரம்ப் நிருபர்களிடம் கூறியதாவது, “நாங்கள் இப்போது ஒரு கோல்ட் கார்டை விற்கப் போகிறோம். இந்த கார்டின் விலை சுமார் $5 மில்லியன் இருக்கும். இது உங்களுக்கு கிரீன் கார்டு சலுகைகளை வழங்கும், மேலும் இது அமெரிக்க குடியுரிமைக்கு ஒரு வழியாகவும் அமையும். இந்த கார்டை வாங்கும் பணக்காரர்கள் நமது நாட்டிற்கு வருவார்கள்.” இந்த திட்டத்தின் விவரங்கள் இரண்டு வாரங்களில் வெளியிடப்படும் என்றும் அவர் தெரிவித்தார்.
ஒரு நிருபர் ரஷியன் எண்ணை கிணறு செல்வந்தர்கள், இந்த கோல்ட் கார்டுக்கு தகுதியானவர்களாக இருப்பார்களா என்று கேட்டபோது, டிரம்ப், “ஆம், சாத்தியம். நான் சில ரஷியன் எண்ணை கிணறு செல்வந்தர்கள் அறிவேன், அவர்கள் மிகவும் நல்லவர்கள்,” என்று பதிலளித்தார்.
“EB-5” முதலீட்டாளர் திட்டம், அமெரிக்க குடியுரிமை மற்றும் குடிவரவு சேவைகள் (USCIS) மூலம் நிர்வகிக்கப்படுகிறது. இந்த திட்டம் 1990-ல் காங்கிரஸால் உருவாக்கப்பட்டது, மேலும் இது வெளிநாட்டு முதலீட்டாளர்கள் மூலம் அமெரிக்க பொருளாதாரத்தை ஊக்குவிப்பதற்காக வேலைவாய்ப்புகளை உருவாக்குவதை நோக்கமாகக் கொண்டுள்ளது.
வணிக செயலாளர் ஹோவர்ட் லுட்னிக் நிருபர்களிடம் கூறியதாவது, “EB-5 திட்டம் முழுக்கதைகள், போலியான விஷயங்கள் மற்றும் மோசடிகளால் நிரம்பியிருந்தது. இது குறைந்த விலையில் கிரீன் கார்டு பெறுவதற்கான ஒரு வழியாக இருந்தது. எனவே, ஜனாதிபதி இந்த EB-5 திட்டத்தை முடித்துவிட்டு, அதற்கு பதிலாக டிரம்ப் கோல்ட் கார்டை அறிமுகப்படுத்த உத்தேசித்துள்ளார்.”