காசா மீது இஸ்ரேல் விதித்துள்ள 16 ஆண்டு கால கடல் முற்றுகையை உடைக்கும் நோக்குடன் சென்ற ‘குளோபல் சுமுத் ஃபுளோட்டிலா’ (Global Sumud Flotilla – GSF) என்ற 42 கப்பல்கள் கொண்ட பாலஸ்தீன ஆதரவுக் குழுவின் கடைசிப் படகை இஸ்ரேலிய கடற்படையினர் இடைமறித்து (Intercept) தங்கள் கட்டுப்பாட்டுக்குள் கொண்டு வந்துள்ளனர்.
‘மாரிநெட்’ (Marinette) என்ற போலந்து கொடியிடப்பட்ட பாய்மரப் படகுதான் அந்தக் குழுவில் இருந்து கடைசியாக இடைமறிக்கப்பட்டது. இதில் துருக்கி, ஜெர்மனி, ஓமன் மற்றும் ஆஸ்திரேலியா நாடுகளைச் சேர்ந்த ஆறு பேர் கொண்ட குழுவினர் இருந்தனர்.
இந்த இறுதிப் படகு, காசா கடற்கரையில் இருந்து சுமார் 42.5 கடல் மைல் தொலைவில் வெள்ளிக்கிழமை அதிகாலை இடைமறிக்கப்பட்டது. 2009-ஆம் ஆண்டு இஸ்ரேல் முற்றுகையை விதித்த பிறகு, உதவிப் பணிக்காக காசா கடற்கரைக்கு 70 கடல் மைல்களுக்கு நெருக்கமாக ஒரு கப்பல் வந்தது இதுவே முதல் முறை என ஏற்பாட்டாளர்கள் கூறுகின்றனர்.
மொத்தம் சுமார் 500 நாடாளுமன்ற உறுப்பினர்கள், வழக்கறிஞர்கள் மற்றும் ஆர்வலர்கள் உள்ளிட்டோர் இந்தப் படகுகளில் இருந்ததாக ஏற்பாட்டாளர்கள் தெரிவித்தனர். இவர்களில் நோபல் பரிசுக்கு பரிந்துரைக்கப்பட்ட ஸ்வீடன் சுற்றுச்சூழல் ஆர்வலர் கிரெட்டா துன்பெர்க்கும் (Greta Thunberg) அடங்குவார்.
படகில் இருந்த ஆர்வலர்கள் அனைவரும் இஸ்ரேலால் தடுத்து வைக்கப்பட்டு, நாடுகடத்தும் (Deportation) நடவடிக்கைகள் மேற்கொள்ளப்பட்டு வருவதாக இஸ்ரேலிய வெளியுறவு அமைச்சகம் தெரிவித்துள்ளது.
இந்தக் கப்பல்கள் குழு, காசாவிற்கு மனிதாபிமான உதவிகளை (Symbolic Humanitarian Aid) கொண்டு செல்வதாகவும், சட்டவிரோதமான கடல் முற்றுகையை எதிர்ப்பதாகவும் கூறி காசா நோக்கிச் சென்றன.
2010-ஆம் ஆண்டில், இதேபோன்ற ஒரு உதவிப் படகுக் குழுவை இஸ்ரேலிய கமாண்டோக்கள் தாக்கியதில் 10 துருக்கி நாட்டு ஆர்வலர்கள் கொல்லப்பட்டனர் என்பது குறிப்பிடத்தக்கது.
