பிரிட்டிஷ் அமைச்சரவை, பிரதமர் கெயில் ஸ்டார்மரின் அவசர அழைப்பால் அதிரடியாகக் கூடுகிறது! உலகையே கலக்கி வரும் காசா நெருக்கடிதான் இந்த அவசரக் கூட்டத்தின் மையப்புள்ளி எனத் தகவல்கள் தெரிவிக்கின்றன. பாலஸ்தீன நாட்டை அங்கீகரிக்க வேண்டும் என்ற லேபர் கட்சியின் உள்நாட்டு அழுத்தம் உச்சக்கட்டத்தை எட்டியுள்ள நிலையில், ஸ்டார்மரின் இந்த அதிரடி நடவடிக்கை பெரும் எதிர்பார்ப்பை ஏற்படுத்தியுள்ளது!
வரும் நாட்களில் ஸ்காட்லாந்தில் அமெரிக்க அதிபர் டொனால்ட் டிரம்ப்புடன் ஸ்டார்மர் காசா குறித்து நேரடியாகப் பேசவுள்ளார். இந்த சந்திப்புக்கு முன்னதாகவே அமைச்சரவையைக் கூட்டுவது, பிரிட்டனின் வெளியுறவுக் கொள்கையில் ஒரு முக்கிய திருப்பத்தைக் குறிப்பதாகப் பார்க்கப்படுகிறது. போர்நிறுத்தத்தை நிலைநாட்டுவது மற்றும் மனிதாபிமான உதவிகளை விரைவுபடுத்துவது குறித்து இரு தலைவர்களும் விவாதிப்பார்கள் என எதிர்பார்க்கப்படுகிறது.
பிரான்ஸ், ஸ்பெயின், நார்வே, அயர்லாந்து போன்ற நாடுகள் பாலஸ்தீன நாட்டை அங்கீகரித்துள்ள நிலையில், பிரிட்டன் எப்போது அங்கீகரிக்கும் என்ற கேள்வி ஸ்டார்மர் மீது கடும் அழுத்தத்தை ஏற்படுத்தியுள்ளது. தனது கட்சியிலேயே 220-க்கும் மேற்பட்ட நாடாளுமன்ற உறுப்பினர்கள் பாலஸ்தீனத்தை உடனடியாக அங்கீகரிக்க வேண்டும் என்று கடிதம் எழுதியுள்ளனர்.
காசாவில் பட்டினிச் சாவுகளும், மனிதாபிமான நெருக்கடியும் நாளுக்கு நாள் மோசமடைந்து வரும் நிலையில், பிரிட்டன் அமெரிக்காவின் நிலைப்பாட்டில் இருந்து விலகி, ஒரு சுயாதீனமான முடிவை எடுக்குமா என்பதே உலக நாடுகளின் எதிர்பார்ப்பு! இந்த அமைச்சரவைக் கூட்டமும், டிரம்ப்புடனான சந்திப்பும் பிரிட்டனின் காசா கொள்கையில் ஒரு புதிய சகாப்தத்தைத் தொடங்குமா என்பதைப் பொறுத்திருந்துதான் பார்க்க வேண்டும்!
