ஐக்கிய ராஜ்யத்தின் பல நகரங்களில் பயங்கரமான “சோனிக் பூம்” சத்தம் கேட்டதால், வீடுகள் அதிர்ந்ததாக அப்பகுதி மக்கள் அச்சத்துடன் தெரிவித்தனர். ராயல் ஏர் ஃபோர்ஸ் (RAF) ஜெட் விமானங்கள் ஒரு விமானத்தை பின்தொடர்ந்து, பெரிய விமான நிலையத்தில் தரையிறங்க உதவியபோது இந்த சம்பவம் நிகழ்ந்தது.
இங்கிலாந்தில் உள்ள பீட்டர்பரோ (Peterborough) நகருக்கு அருகில், ராயல் ஏர் ஃபோர்ஸ் (RAF) இன் டைஃபுன் ரக ஜெட் விமானங்கள், “க்விக் ரியாக்ஷன் அலர்ட்” (Quick Reaction Alert) எனப்படும் அவசர எச்சரிக்கைக் குறியீடான 1326-ஐப் பயன்படுத்தி விரைந்து செயல்பட்டன. பிரான்சின் நீஸ் (Nice) நகரிலிருந்து புறப்பட்ட T7-SGH என்ற பதிவெண் கொண்ட பாம்பார்டியர் குளோபல் எக்ஸ்பிரஸ் (Bombardier Global Express) விமானம், தரைக் கட்டுப்பாட்டு மையத்துடனான தொடர்பை இழந்ததால் இந்த அவசர நடவடிக்கை எடுக்கப்பட்டது.
RAF ஜெட் விமானங்கள் ஒலியின் வேகத்தைவிட வேகமாகப் பயணித்ததால், இங்கிலாந்தின் கிழக்கு மற்றும் தென்கிழக்கு பகுதிகளான எசெக்ஸ் (Essex), கென்ட் (Kent), கேம்பிரிட்ஜ்ஷைர் (Cambridgeshire) மற்றும் லண்டனின் சில பகுதிகளில் பயங்கரமான “சோனிக் பூம்” சத்தம் கேட்டது. இச்சத்தத்தைக் கேட்ட பொதுமக்கள் “பெரிய வெடிச்சத்தம்” அல்லது “வெடிப்பு” கேட்டதாகக் கூறினர், இதனால் வீடுகள்கூட குலுங்கியதாக சமூக ஊடகங்களில் தெரிவித்தனர்.
பின்னர், அந்த தனிப்பட்ட விமானம் பத்திரமாக லண்டன் ஸ்டான்ஸ்டெட் விமான நிலையத்திற்கு அழைத்துச் செல்லப்பட்டது. சோனிக் பூம் சத்தம் கேட்ட பிறகு, எசெக்ஸ் காவல்துறை (Essex Police) சம்பவ இடத்தை ஆய்வு செய்து, “ஆபத்து ஏதும் இல்லை” என்பதை உறுதிப்படுத்தியது. ஒலியின் வேகத்தைத் தாண்டி விமானங்கள் பயணிக்கும்போது ஏற்படும் அதிர்வலைகளே இந்த வெடிச்சத்ததிற்குக் காரணம் என்று நம்பப்படுகிறது.
