மாட்ரிட்:
ஸ்பெயின் தலைநகர் மாட்ரிட்டில், சாம்பியன்ஸ் லீக் கால்பந்து போட்டியில் ரியல் மாட்ரிட் அணிக்கும் பிரெஞ்சு கிளப்பான மார்சே (Marseille) அணிக்கும் இடையே நடந்த போட்டிக்கு முன்னதாக, பிரெஞ்சு ரசிகர்களுக்கும் ஸ்பெயின் போலீசாருக்கும் இடையே மோதல் ஏற்பட்டது.
மோதல் நடந்தது ஏன்?
சாண்டியாகோ பெர்னபேவ் (Santiago Bernabeu) மைதானத்திற்கு வெளியே, ரசிகர்கள் மைதானத்திற்குள் நுழையக் காத்திருந்தபோது, போலீசாருக்கும் ரசிகர்களுக்கும் இடையே வாக்குவாதம் ஏற்பட்டு, அது மோதலாக மாறியது. போலீசார், தடியடி நடத்தி ரசிகர்களைக் கலைக்க முயன்றனர். அப்போது, கலவரத் தடுப்புப் படையினர் மற்றும் குதிரைப்படைப் போலீசார் பயன்படுத்தப்பட்டனர். சில நிமிடங்களில் நிலைமை கட்டுக்குள் கொண்டுவரப்பட்டது. ரசிகர்கள் சரியான நேரத்தில் மைதானத்திற்குள் அனுமதிக்கப்பட்டனர்.
பாலஸ்தீனக் கொடிக்குத் தடை:
இந்த சம்பவத்தைத் தொடர்ந்து, மைதானத்திற்குள் நுழைய முயன்ற ரசிகர்களிடம் இருந்த பாலஸ்தீனக் கொடிகளை ரியல் மாட்ரிட் மைதானத்தின் பாதுகாப்புப் பணியாளர்கள் பறிமுதல் செய்தனர். மைதானத்திற்குள் பாலஸ்தீனக் கொடிகளை அனுமதிக்காத கொள்கையை அவர்கள் அமல்படுத்தியுள்ளனர். ஸ்பெயினில் சமீபத்தில் நடந்த வுவெல்டா சைக்கிளிங் (Vuelta cycling race) பந்தயத்தில் இஸ்ரேலுக்கு எதிரான போராட்டங்கள் பெரும் பரபரப்பை ஏற்படுத்திய நிலையில், இந்தத் தடை விதிக்கப்பட்டுள்ளது.
சர்ச்சை ஏன்?
ஸ்பெயினில் பாலஸ்தீன ஆதரவு போராட்டங்கள் தீவிரமடைந்து வரும் நிலையில், இந்தத் தடை குறித்து பலரும் கேள்விகளை எழுப்பி வருகின்றனர். பாலஸ்தீன மக்களுக்கான ஆதரவை வெளிப்படுத்த கொடிகளைப் பயன்படுத்த ரசிகர்கள் முயன்றதாகவும், இது கருத்துச் சுதந்திரத்திற்கு எதிரானது எனவும் பலரும் சமூக வலைதளங்களில் குற்றம் சாட்டி வருகின்றனர்.
