சூடானில் ராணுவத்துடன் மோதலில் ஈடுபட்டுள்ள துணை ராணுவப் படைகள், டார்ஃபூரின் கடைசி பெரிய நகரமான எல்-ஃபாஷரை கைப்பற்றும் முயற்சியில் கடந்த 10 நாட்களில் குறைந்தது 165 அப்பாவி பொதுமக்களை கொன்று குவித்துள்ளதாக செயற்பாட்டாளர்கள் அதிர்ச்சி தகவலை வெளியிட்டுள்ளனர்! 2023 ஏப்ரல் முதல் நாட்டின் வழக்கமான ராணுவத்துடன் கடுமையான போரில் ஈடுபட்டுள்ள ராபிட் சப்போர்ட் போர்சஸ் (RSF) எனப்படும் துணை ராணுவப் படைகள், முற்றுகையிடப்பட்ட இந்த நகரின் மீது 750க்கும் மேற்பட்ட மோட்டார் மற்றும் பீரங்கி குண்டுகளை சரமாரியாக வீசியுள்ளதாக நகரத்தின் எதிர்ப்பு குழுவும், தன்னார்வ உதவி அமைப்பும் தெரிவித்துள்ளது.
சுகாதார நிலையங்களால் உறுதிப்படுத்தப்பட்ட தகவல்களின்படி, இந்த தாக்குதல்களில் 165 பேர் உயிரிழந்துள்ளனர். குடியிருப்பு பகுதிகள், சந்தைகள் மற்றும் இடம்பெயர்ந்தோர் முகாம்கள் என அனைத்தும் “இரத்தக்களரி படுகொலை”யில் இலக்காகி தாக்கப்பட்டதாக அந்த குழு கண்ணீருடன் தெரிவித்துள்ளது. கடந்த மாதம் தலைநகர் கார்தூமை இழந்ததற்கு பதிலடி கொடுக்கும் வகையில், எல்-ஃபாஷருக்கான போர் சமீப வாரங்களில் தீவிரமடைந்துள்ளது.
ஐக்கிய நாடுகள் சபையின் பொதுச்செயலாளர் அன்டோனியோ குட்டெரஸ், வடக்கு டார்ஃபூர் மாநிலம் மற்றும் அதன் தலைநகரான எல்-ஃபாஷரில் அதிகரித்து வரும் பேரழிவு நிலை குறித்து “திகிலடைந்துள்ளேன்” என்று வேதனையுடன் கூறியுள்ளார். இடம்பெயர்ந்த மக்கள் சோதனைச் சாவடிகளில் துன்புறுத்தப்படுவது, மிரட்டப்படுவது மற்றும் தன்னிச்சையாக தடுத்து வைக்கப்படுவது குறித்த அறிக்கைகள் குறித்து அவர் “ஆழ்ந்த கவலை” கொண்டுள்ளார் என்று அவரது செய்தித் தொடர்பாளர் ஃபர்ஹான் ஹக் அறிக்கையில் தெரிவித்துள்ளார்.
மூன்றாவது ஆண்டை எட்டியுள்ள இந்த கொடிய போரில் பல்லாயிரக்கணக்கான மக்கள் கொல்லப்பட்டுள்ளனர் மற்றும் 13 மில்லியன் மக்கள் இடம்பெயர்ந்துள்ளனர். ராணுவம் நாட்டின் மையம், கிழக்கு மற்றும் வடக்கு பகுதிகளைக் கட்டுப்படுத்துகிறது. அதே நேரத்தில் RSF டார்ஃபூரின் பெரும்பகுதி மற்றும் தெற்கின் சில பகுதிகளைக் கட்டுப்படுத்துகிறது. இதனால் நாடு உண்மையில் இரண்டாக பிளவுபட்டுள்ளது. சூடானின் ஐந்து பகுதிகளில் பஞ்சம் அறிவிக்கப்பட்டுள்ளது. அவற்றில் மூன்று எல்-ஃபாஷருக்கு வெளியே உள்ள இடம்பெயர்ந்தோர் முகாம்கள் ஆகும். இவை சமீபத்திய சண்டைகளின் களமாக இருந்துள்ளன என்பது மேலும் அதிர்ச்சியை ஏற்படுத்துகிறது. இந்த கட்டுக்கடங்காத வன்முறை டார்ஃபூர் மக்களை பேரழிவின் விளிம்பிற்கு தள்ளியுள்ளது. சர்வதேச சமூகம் உடனடியாக தலையிட்டு அப்பாவி உயிர்களை காப்பாற்ற வேண்டும் என்ற கோரிக்கை வலுத்துள்ளது.