மத்திய கிழக்கில் ஏற்கனவே கொழுந்துவிட்டு எரியும் பதற்றத்தை மேலும் அதிகரிக்கும் விதமாக, ஈரான் அதிபர் மசூத் பெசெஷ்கியான், இஸ்ரேலிய தாக்குதலில் இருந்து நூலிழையில் உயிர் தப்பினார் என்ற அதிர்ச்சித் தகவல் வெளியாகியுள்ளது. இத்தாக்குதலில் அவர் லேசான காயங்களுடன் மீட்கப்பட்டுள்ளதாக தகவல்கள் தெரிவிக்கின்றன.
கடந்த மாதம், தெஹ்ரானின் மேற்குப் பகுதியில் உள்ள உச்ச தேசிய பாதுகாப்புக் கவுன்சில் கூட்டத்தில் அதிபர் மசூத் பெசெஷ்கியான் உள்ளிட்ட உயர்மட்ட அதிகாரிகள் கலந்து கொண்டிருந்தபோது, அந்த கட்டிடத்தின் மீது இஸ்ரேல் வான்வழித் தாக்குதல் நடத்தியுள்ளது. இத்தாக்குதல், லெபனானின் ஹிஸ்புல்லா தலைவர் ஹசன் நஸ்ரல்லாவை படுகொலை செய்ய இஸ்ரேல் பயன்படுத்திய அதே பாணியில் நடத்தப்பட்டதாக தகவல்கள் கூறுகின்றன.
தாக்குதலின்போது, கட்டிடத்தின் நுழைவு மற்றும் வெளியேறும் வழிகளை குறிவைத்து ஆறு ஏவுகணைகள் பாய்ந்ததாகவும், தப்பிக்கும் வழிகளை அடைத்து, காற்றோட்டத்தை தடுப்பதே இதன் நோக்கம் என்றும் கூறப்படுகிறது. அதிர்ஷ்டவசமாக, கட்டிடத்தின் கீழ் தளங்களில் இருந்த அதிகாரிகள், மின்சாரம் துண்டிக்கப்பட்ட போதிலும், அவசரகால வெளியேறும் வழியைப் பயன்படுத்தி தப்பியுள்ளனர்.
இத்தாக்குதலில் அதிபர் பெசெஷ்கியான் மற்றும் சில அதிகாரிகள் வெளியேறும் போது காலில் லேசான காயமடைந்ததாக ஈரானிய ஊடகங்கள் தெரிவித்துள்ளன. தாக்குதலின் துல்லியம் குறித்து விசாரிக்கப்பட்டு வருவதாகவும், உளவுத்தகவல் கசிந்திருக்கலாம் என்ற சந்தேகம் எழுந்துள்ளதாகவும் கூறப்படுகிறது.
இந்த சம்பவம் ஈரானில் பெரும் கொந்தளிப்பை ஏற்படுத்தியுள்ளது. ஏற்கனவே இஸ்ரேல்-ஈரான் இடையே நிலவும் போர் பதற்றத்தை இது மேலும் அதிகரித்துள்ளது. இது மத்திய கிழக்கில் புதிய சிக்கல்களை உருவாக்குமா என்ற அச்சம் உலக நாடுகளிடையே எழுந்துள்ளது.