தெற்கு சீனக் கடலில் உள்ள சர்ச்சைக்குரிய மணல் திட்டு ஒன்றை பெய்ஜிங் தனது கட்டுப்பாட்டின் கீழ் கொண்டு வந்துள்ளதாக சீன அரசு ஊடகம் வெளியிட்ட “பொறுப்பற்ற” அறிக்கையை பிலிப்பைன்ஸ் திங்களன்று கடுமையாக சாடியுள்ளது. நிலைமை மாறவில்லை என்றும் மணிலா திட்டவட்டமாக தெரிவித்துள்ளது.
சாண்டி கே (Sandy Cay) திட்டு, பிலிப்பைன்ஸ் துருப்புக்களை நிறுத்தி வைத்துள்ள மற்றும் கடலோர காவல்படை கண்காணிப்பு தளத்தை பராமரித்து வரும் திட்டு தீவு அல்லது பகாசாவுக்கு அருகில் அமைந்துள்ளது. சீன அரசு ஒளிபரப்பாளரான சிசிடிவி (CCTV) சனிக்கிழமையன்று, சீனாவின் கடலோர காவல்படை ஏப்ரல் நடுப்பகுதியில் சாண்டி கேவின் ஒரு பகுதியான Tiexian Reef மீது “கடல்சார் கட்டுப்பாட்டை” செயல்படுத்தியுள்ளதாக கூறியது. தெற்கு சீனக் கடல் தொடர்பாக பிலிப்பைன்ஸுக்கும் சீனாவுக்கும் இடையே பல மாதங்களாக மோதல்கள் நீடித்து வருகின்றன. பெய்ஜிங் கிட்டத்தட்ட முழு கடற்பரப்பையும் தனது கட்டுப்பாட்டில் இருப்பதாக கூறுகிறது. ஆனால் சர்வதேச தீர்ப்பு ஒன்று சீனாவின் இந்த கூற்றுக்கு சட்டப்பூர்வ அடிப்படை இல்லை என்று கூறியுள்ளது குறிப்பிடத்தக்கது.
திங்களன்று நடைபெற்ற செய்தியாளர் சந்திப்பில் பேசிய தேசிய பாதுகாப்பு கவுன்சில் செய்தித் தொடர்பாளர் ஜொனாதன் மலாயா, “சாண்டி கே மணல் திட்டுகள் கைப்பற்றப்பட்டதாக சீனா கடலோர காவல்படை கூறுவதில் எந்த உண்மையும் இல்லை. மிரட்டுவதற்கும் துன்புறுத்துவதற்கும் தகவல்தளத்தைப் பயன்படுத்துவது சீன மக்கள் குடியரசின் நலனுக்கு உகந்தது. சாண்டி கே அறிக்கை ஒரு புனையப்பட்ட கதை. அதை வெளியிட்டது பொறுப்பற்ற செயல்,” என்று காட்டமாக தெரிவித்தார்.
சிசிடிவி சனிக்கிழமையன்று நான்கு கடலோர காவல்படை அதிகாரிகள் தேசியக் கொடியுடன் அந்த திட்டின் வெள்ளை மேற்பரப்பில் போஸ் கொடுக்கும் புகைப்படத்தை வெளியிட்டது. இதனை அந்த ஒளிபரப்பாளர் “இறையாண்மைக்கான உறுதிமொழி” என்று வர்ணித்தார். திங்களன்று, பிலிப்பைன்ஸ் கடலோர காவல்படை தனது சொந்த புகைப்படத்தை வெளியிட்டது. அதில் பிலிப்பைன்ஸ் கடற்படையினர் முந்தைய நாள் அதிகாலை நடவடிக்கையின்போது அதே சர்ச்சைக்குரிய திட்டில் நாட்டின் கொடியை ஏந்தி நின்றனர். ஸ்ப்ராட்லி தீவுகளில் உள்ள சிறிய மணல் திட்டுகளின் தொகுப்பான இந்த திட்டில் சீனா நிரந்தரமாக ஆக்கிரமித்துள்ளதாகவோ அல்லது கட்டமைப்பு எதையும் கட்டியுள்ளதாகவோ எந்த அறிகுறிகளும் காணப்படவில்லை.
சமீபத்திய மாதங்களில், தென் சீனக் கடலில் உள்ள பல சர்ச்சைக்குரிய நிலப்பரப்புகளின் சுற்றுச்சூழல் சீரழிவுக்கு பெய்ஜிங்கும் மணிலாவும் பரஸ்பரம் குற்றம் சாட்டி வருகின்றன. அமெரிக்கா மற்றும் பிலிப்பைன்ஸ் இராணுவத்தினர் தற்போது கூட்டுப் பயிற்சிகளை நடத்தி வருகின்றனர். இது பிராந்திய ஸ்திரத்தன்மைக்கு அச்சுறுத்தலாக இருப்பதாக பெய்ஜிங் கூறியுள்ளது. கடந்த வாரம் இருதரப்பு “பாலிகடன்” பயிற்சிகள் தொடங்கியதிலிருந்து சீன போர்க்கப்பல்கள் பிலிப்பைன்ஸ் நீர்ப்பரப்பில் காணப்படுகின்றன. ஷான்டாங் விமானம் தாங்கிக் கப்பல் வடக்கு பாபுயான் தீவிலிருந்து சுமார் 2.23 கடல் மைல் (சுமார் நான்கு கிலோமீட்டர்) தொலைவில் வந்ததாக கூறப்படுகிறது. இந்த சம்பவங்கள் தெற்கு சீனக் கடலில் பதற்றத்தை மேலும் அதிகரித்துள்ளது.