ஐ.பி.எல். தொடரின் இறுதிப் போட்டியில் பஞ்சாப் அணியை 6 ஓட்டங்களால் வீழ்த்தி முதல் முறையாக RCB அணி கோப்பையைக் கைப்பற்றியது. இந்த வரலாற்றுச் சிறப்புமிக்க வெற்றியை அந்த அணியின் ரசிகர்கள் நேற்று முதல் தற்போது வரை வெறித்தனமாகக் கொண்டாடி வருகின்றனர். இந்த கொண்டாட்டங்களின் உச்சமாக, இன்று மாலை 6 மணிக்கு சின்னசாமி மைதானத்தில் RCB வீரர்களுக்குப் பாராட்டு விழா நடத்தத் தீர்மானிக்கப்பட்டிருந்தது. இந்த அறிவிப்பையடுத்து, சின்னசாமி மைதானத்தை நோக்கி RCB ரசிகர்கள் கூட்டம் கூட்டமாகப் படையெடுக்கத் தொடங்கினர்.
ஆரம்பத்தில் பெரும் ஆரவாரத்துடன் காணப்பட்ட இந்த நிகழ்வு, ரசிகர்கள் கட்டுக்கடங்காமல் திரண்டதால் பெரும் கூட்ட நெரிசலாக மாறியது. RCB வீரர்கள் வரும்வரை பொறுமையாக இருக்காத ரசிகர்கள், ஸ்டேடியத்தின் சுவர்கள் மற்றும் வேலிகளில் ஏறிச் செல்லத் தொடங்கினர். இது அங்கே பெரும் பரபரப்பையும், தள்ளுமுள்ளுவையும் ஏற்படுத்தியது. நிலைமையைக் கட்டுப்படுத்த முடியாத பாதுகாப்புப் படையினர் திணறினர்.
இதன் காரணமாக ஏற்பட்ட கூட்ட நெரிசலில் சிக்கி 8 பேர் பரிதாபமாக உயிரிழந்துள்ளனர். மேலும், 20 க்கும் மேற்பட்டோர் படுகாயமடைந்த நிலையில் உடனடியாக வைத்தியசாலையில் அனுமதிக்கப்பட்டுள்ளனர். இந்தச் சம்பவம், RCB இன் வரலாற்று வெற்றிக் கொண்டாட்டங்களுக்கு ஒரு பெரும் சோகப் பரிணாமத்தைக் கொடுத்துள்ளது. ரசிகர்களின் அதீத உற்சாகமும், பாதுகாப்பு ஏற்பாடுகளில் ஏற்பட்ட தொய்வும் இந்தக் கோர விபத்திற்குக் காரணமாக அமைந்துள்ளமை குறிப்பிடத்தக்கது. இந்த துயரச் சம்பவம், இனிவரும் காலங்களில் இதுபோன்ற நிகழ்வுகளில் பாதுகாப்பு ஏற்பாடுகளை மேலும் பலப்படுத்த வேண்டியதன் அவசியத்தை உணர்த்துகிறது.