சவுதி அரேபியாவின் “உறங்கும் இளவரசர்” என்று அழைக்கப்பட்ட இளவரசர் அல்-வலீத் பின் காலித் பின் தலால் அல் சவுத், கிட்டத்தட்ட 20 ஆண்டுகள் கோமாவில் இருந்த நிலையில், தனது 36வது வயதில் காலமானார். அவரது மறைவு சவுதி அரச குடும்பத்திலும், உலகெங்கிலும் உள்ள மக்கள் மத்தியிலும் ஆழ்ந்த சோகத்தை ஏற்படுத்தியுள்ளது.
2005 ஆம் ஆண்டில் லண்டனில் ஒரு இராணுவக் கல்லூரியில் படித்துக் கொண்டிருந்தபோது, 15 வயதான இளவரசர் அல்-வலீத் ஒரு பயங்கர கார் விபத்தில் சிக்கினார். இந்த விபத்தில் அவருக்கு மூளையில் கடுமையான காயம் மற்றும் உள் இரத்தப்போக்கு ஏற்பட்டது. உடனடி மருத்துவ சிகிச்சை அளிக்கப்பட்ட போதிலும், அவர் கோமா நிலைக்குச் சென்று, அதன் பின்னர் ஒருபோதும் முழுமையாக உணர்வு பெறவில்லை.
சுமார் இரண்டு தசாப்தங்களாக அல்-வலீத் ஆழ்ந்த கோமாவில் இருந்தார். அவரது தந்தை, இளவரசர் காலித் பின் தலால் அல் சவுத், தனது மகனுக்கு உயிர் காக்கும் கருவிகளை அகற்ற வேண்டும் என்ற மருத்துவ ஆலோசனைகளை உறுதியாக மறுத்துவிட்டார். “வாழ்க்கையும் மரணமும் அல்லாஹ்வின் கைகளில் உள்ளது” என்ற அசைக்க முடியாத நம்பிக்கையுடன், தனது மகனின் படுக்கையருகே ஒவ்வொரு ஆண்டும் தொடர்ந்து காத்திருந்தார். அவரது அசைக்க முடியாத தந்தை பாசம் பலரையும் நெகிழச் செய்தது.
இளவரசர் அல்-வலீத் சில சமயங்களில் விரல்களை அசைப்பது போன்ற சிறிய அசைவுகளைக் காட்டும் வீடியோக்கள் சமூக வலைத்தளங்களில் வெளியாகி, அவரது குடும்பத்திற்கும், நலம் விரும்பிகளுக்கும் சிறிது நம்பிக்கையை அளித்தன.
இளவரசரின் மறைவு சவுதி அரேபியா முழுவதும் ஆழ்ந்த இரங்கலைத் தூண்டியுள்ளது. சமூக வலைத்தளங்களில் “SleepingPrince” என்ற ஹேஷ்டேக் பரவலாகப் பகிரப்பட்டு, பல்லாயிரக்கணக்கான மக்கள் தங்கள் இரங்கலைத் தெரிவித்து வருகின்றனர். பொறுமை, நம்பிக்கை மற்றும் தந்தை பாசத்தின் அடையாளமாக அவர் பார்க்கப்பட்டார்.
இளவரசர் அல்-வலீத் பின் காலித் பின் தலால் அல் சவுத்தின் இறுதி சடங்குகள் இன்று நேற்றைய தினம் ரியாத்தில் உள்ள இமாம் துர்கி பின் அப்துல்லா மசூதியில் நடைபெறும் என அறிவிக்கப்பட்டுள்ளது.
