அமெரிக்காவின் மினசோட்டா மாகாணத்தில் உள்ள ஒரு கத்தோலிக்கப் பள்ளியில் நடத்தப்பட்ட துப்பாக்கிச் சூட்டில் இரண்டு குழந்தைகள் கொல்லப்பட்ட சம்பவத்தைத் தொடர்ந்து, உலகெங்கிலும் பரவி வரும் ‘ஆயுதங்களின் பெருந்தொற்று’ (pandemic of arms) முடிவுக்கு வர வேண்டும் என்று திருத்தந்தை லியோ XIV வேண்டுகோள் விடுத்துள்ளார்.
கடந்த வெள்ளிக்கிழமை மினசோட்டா, மினியாபோலிஸில் உள்ள தேவாலயத்தில் நடந்த துப்பாக்கிச் சூட்டில், நூற்றுக்கணக்கான மாணவர்கள் கலந்துகொண்டிருந்த பள்ளித் திருவழிபாட்டின்போது, ஒரு துப்பாக்கிதாரி கண்ணாடிகளை உடைத்து உள்ளே நுழைந்து தாக்குதல் நடத்தியுள்ளார். இந்தத் தாக்குதலில் இரண்டு குழந்தைகள் கொல்லப்பட்டனர், 20 பேர் காயமடைந்தனர். துப்பாக்கிச் சூடு நடத்தியவர் பின்னர் தற்கொலை செய்து கொண்டார்.
இந்தச் சம்பவம் குறித்து தனது ஆழ்ந்த இரங்கலைத் தெரிவித்த திருத்தந்தை, “இந்த உலகம் சிறிய மற்றும் பெரிய ஆயுதங்களால் பாதிக்கப்பட்டிருக்கிறது. இது ஒரு தொற்றுநோய் போன்றது. இந்த ஆயுதங்களின் பெருந்தொற்றை நிறுத்தும்படி இறைவனிடம் வேண்டுவோம்” என்று கூறினார். செயின்ட் பீட்டர்ஸ் சதுக்கத்தில் இருந்த ஆயிரக்கணக்கான மக்களிடம் அவர் பேசும்போது, மினசோட்டா தாக்குதலுடன், உலகெங்கிலும் நடந்து வரும் போர்கள் மற்றும் ஆயுத மோதல்களால் பாதிக்கப்பட்ட எண்ணற்ற குழந்தைகளையும் நினைவு கூர்ந்தார்.
மேலும், உக்ரைனில் உடனடியாக போர் நிறுத்தத்தை ஏற்படுத்துமாறும் அவர் வலியுறுத்தினார். “ஆயுதங்களின் குரல் ஓய வேண்டும், சகோதரத்துவம் மற்றும் நீதியின் குரல் ஓங்க வேண்டும்,” என்றும் அவர் தெரிவித்தார்.
திருத்தந்தை லியோவின் இந்த அறிக்கை, அமெரிக்காவில் ஆயுதக் கட்டுப்பாடு குறித்த விவாதத்தை மீண்டும் கிளப்பியுள்ளது. அவரது இந்த வலுவான வார்த்தைகள், அமைதிக்கான கத்தோலிக்க திருச்சபையின் உறுதியான நிலைப்பாட்டை மீண்டும் உறுதிப்படுத்துவதாகக் கருதப்படுகிறது.
