அமெரிக்க நாடாளுமன்ற உறுப்பினர்கள் குழு ஒன்று, வர்த்தகம் மற்றும் டிக்டாக் விவகாரங்களில் கடும் மோதல் நிலவி வரும் நிலையில், திடீரென சீனாவுக்குப் பயணம் மேற்கொண்டிருப்பது உலக அரசியலில் பெரும் பரபரப்பை ஏற்படுத்தியுள்ளது.
அமெரிக்க அதிபர் டொனால்ட் டிரம்ப், சீன அதிபர் ஜி ஜின்பிங் ஆகியோரிடையே சமீபத்தில் நடைபெற்ற தொலைபேசி உரையாடலுக்குப் பிறகு இந்த பயணம் நிகழ்ந்திருப்பது முக்கியத்துவம் பெறுகிறது. டிக்டாக் நிறுவனத்தின் அமெரிக்க செயல்பாடுகளை, அமெரிக்க நிறுவனங்களுக்கு விற்கும் விவகாரத்தில் இரு நாடுகளும் ஒருமித்த கருத்துக்கு வந்துள்ளதாகத் தகவல்கள் வெளியான நிலையில், நாடாளுமன்ற உறுப்பினர்களின் இந்த ரகசியப் பயணம் பல்வேறு யூகங்களை கிளப்பியுள்ளது.
அமெரிக்காவின் இந்த திடீர் நகர்வு, வர்த்தகப் போரினால் ஏற்பட்ட பதற்றத்தை தணிப்பதற்கான முயற்சியாக இருக்கலாம் என அரசியல் வல்லுநர்கள் கருதுகின்றனர். அதே சமயம், தைவான் விவகாரம், தென் சீனக் கடல் போன்ற சிக்கலான பிரச்சினைகள் குறித்தும் இந்த சந்திப்பில் ஆலோசிக்கப்படலாம் என எதிர்பார்க்கப்படுகிறது.
நீண்ட நாட்களாக உறைந்து கிடந்த அமெரிக்க – சீன உறவுகளில், இந்த பயணம் ஒரு “பனிக்கட்டியை உடைக்கும்” நிகழ்வாக பார்க்கப்படுகிறது. ஆனால், இந்த சந்திப்பின் உண்மையான நோக்கம் என்ன? டிக்டாக் விவகாரத்தில் என்ன முடிவெடுக்கப்படும்? வர்த்தகப் போருக்கு ஒரு முற்றுப்புள்ளி வைக்கப்படுமா? – போன்ற கேள்விகள், உலக அரசியல் களத்தில் பெரும் எதிர்பார்ப்பை ஏற்படுத்தியுள்ளன. இந்த பயணம், இரு நாடுகளின் எதிர்கால உறவுகளில் என்ன மாற்றங்களை ஏற்படுத்தும் என்பதை பொறுத்திருந்துதான் பார்க்க வேண்டும்.
