Dalai Lama marks his 90th birthday as crowds throng his home-in-exile

திபெத்தின் ஆன்மிகத் தலைவரான 14வது தலாய் லாமா, நேற்றையதினம்  தனது 90வது பிறந்தநாளை, இந்தியாவில் உள்ள தனது நாடுகடந்த இருப்பிடமான தர்மசாலாவில், பல்லாயிரக்கணக்கான பக்தர்களின் மத்தியில் வெகு விமர்சையாகக் கொண்டாடினார். இந்த சிறப்புமிக்க நிகழ்வில், உலகெங்கிலும் இருந்தும் ஏராளமானோர் திரண்டு வந்து, தங்களின் குருவுக்கு வாழ்த்து தெரிவித்தனர்.

1959 ஆம் ஆண்டு சீன ஆதிக்கத்தில் இருந்து தப்பித்து இந்தியாவுக்கு வந்த தலாய் லாமா, அன்று முதல் தர்மசாலாவிலேயே வசித்து வருகிறார். அவரது 90வது பிறந்தநாளையொட்டி, அவரது இல்லம் அமைந்துள்ள பகுதியில், நூற்றுக்கணக்கான சிவப்பு அங்கியணிந்த புத்த பிக்குகள் மற்றும் பக்தர்கள், தொடர்ந்து பெய்துவரும் மழைக்கு மத்தியிலும் கூடினர்.

இந்த கொண்டாட்டத்தில் இந்திய அரசின் முக்கிய பிரமுகர்கள், மாநில முதலமைச்சர்கள் மற்றும் ஹாலிவுட் நடிகர் ரிச்சர்ட் கியர் போன்ற பிரபலங்களும் கலந்துகொண்டனர். தலாய் லாமாவின் நீண்ட ஆயுளுக்காக சிறப்புப் பிரார்த்தனைகள் நடத்தப்பட்டன. பிரதமர் நரேந்திர மோடியும் தனது வாழ்த்துக்களைத் தெரிவித்தார்.

தனது பிறந்தநாளுக்கு ஒரு நாள் முன்பு, தான் மரணத்திற்குப் பிறகு மீண்டும் அவதாரம் எடுப்பதாக தலாய் லாமா தெரிவித்திருந்தார். மேலும், அடுத்த தலாய் லாமா ‘சுதந்திர உலகில்’ பிறக்க வேண்டும் என்றும், பௌத்த மரபுகளின்படி தேர்வு செய்யப்பட வேண்டும் என்றும் வலியுறுத்தினார். இது, அடுத்த தலாய் லாமாவைத் தேர்ந்தெடுப்பதில் சீனா தலையிட முயற்சிக்கும் நிலையில் முக்கியத்துவம் பெறுகிறது.

தலாய் லாமா, உலக அமைதி, இரக்கம் மற்றும் மனித விழுமியங்களை முன்னெடுத்துச் செல்லும் ஒரு உலகளாவிய அடையாளமாகத் திகழ்கிறார். அவரது பிறந்தநாள் கொண்டாட்டங்கள், அவரது நீண்ட காலப் பணிகளையும், உலகெங்கிலும் அவர் பெற்றுள்ள செல்வாக்கையும் எடுத்துக்காட்டின.