Monday, December 10 2018

LYAC TV

இரவு பணிக்கு ஏற்ற உணவுகள்!

Dec 06, 2018    360

இரவு நேர வேலைக்கு உடலும், மனதும் ஒத்துழைக்கும் விதத்தில் பழக்கவழக்கங்களிலும், உணவு விஷயங்களிலும் கவனமாக இருக்க வேண்டும்.

இரவு பணிக்கு ஏற்ற உணவுகள்

பகல் பொழுதில் வேலை பார்த்துவிட்டு இரவில் தூங்கி ஓய்வு எடுக்கும் விதமாகத்தான் நமது உடல் அமைப்பு இருக்கிறது. இருப்பினும் பொருளாதார நிலை கருதி நிறைய பேர் இரவு பணியில் தொடர்ந்து ஈடுபட்டுக்கொண்டிருக்கிறார்கள். இரவு நேர வேலைக்கு உடலும், மனதும் ஒத்துழைக்கும் விதத்தில் பழக்கவழக்கங்களிலும், உணவு விஷயங்களிலும் கவனமாக இருக்க வேண்டும். அதற்கு செய்ய வேண்டிய விஷயங்கள்:

* இரவு வேலைக்கு செல்பவர்கள் இரவு உணவை, காலை உணவுபோல் கருதி சத்தாக சாப்பிட வேண்டும். நிறைய பேர் இரவில் பசி எடுக்கக்கூடாது என்பதற்காக இரவு உணவை தாமதமாக உட்கொள்வார்கள். அது தவறான பழக்கம். இரவு 7.30 மணி முதல் 8 மணிக்குள் சாப்பிட்டுவிட வேண்டும்.

* இரவில் அதிகம் சாப்பிடுவதையும் தவிர்க்க வேண்டும். அரிசி சாதம், பருப்பு குழம்பு, தீயில் வேகவைக்கப்படும் கோழி இறைச்சி உள்ளிட்ட புரதம் மற்றும் நார்ச்சத்து நிறைந்த உணவுகளை உண்ண வேண்டும். அவை தூக்க உணர்வில் இருந்து விடுபட வைக்கும்.



* இரவில் வேலைக்கு செல்வதற்கு முன்பாக எண்ணெயில் வறுத்த உணவுகளை சாப்பிடுவதை தவிர்க்க வேண்டும். இரவு நேரத்தில் செரிமான அமைப்பு ஓய்வெடுக்கும் நிலையில் இருக்கும் என்பதால் உணவு ஜீரணமாகுவது கடினமாகிவிடும். எண்ணெய் வகை உணவுகளை சாப்பிடுவது இரைப்பைக்கும் பாதிப்பை ஏற்படுத்திவிடும். உடல் பருமன் பிரச்சினையும் தோன்றும்.



* இரவு நேரத்தில் பசி உணர்வு அதிகமாக இருக்கும். பசியை போக்குவதற்கு சமோசா, பர்கர் போன்றவற்றை சாப்பிடக்கூடாது. வறுகடலை வகைகள், பாதாம், முந்திரி பருப்பு வகைகளை அளவோடு சாப்பிடுவது நல்லது. அவை உடல் எடையை சீராக பராமரிக்க உதவும். நொறுக்குத்தீனிகள் சாப்பிட வேண்டும் என்ற எண்ணத்தையும் கட்டுப்படுத்தும்.



* இரவு பணியில் இருப்பவர்களில் பெரும்பாலானோர் டீ, காபி வகைகளை குறிப்பிட்ட நேர இடைவெளியில் தொடர்ந்து பருகுவதை வழக்கமாக கொண்டிருப்பார்கள். அதற்கு பதிலாக நீர் மற்றும் ஜூஸ் வகைகள் பருகலாம்.



* இரவு பணியில் இருப்பவர்கள் பழங்கள், காய்கறி, ஜூஸ் வகைகள், கோதுமை பிரெட்டுகள், உலர் திராட்சை, தானிய வகை சாலட்டுகள், வறுத்த தானியங்கள், பாலாடை கட்டி, குறைந்த கொழுப்பு கொண்ட பால், அவித்த முட்டை, மீன், கோழி இறைச்சியில் தயாரிக்கப்பட்ட சாண்ட்விச்சுகள், முளைகட்டிய தானியங்கள் போன்றவற்றை சாப்பிடலாம்.

 

Loading...